Միջոցառում՝ նվիրված Արցախյան ազատամարտի հերոս Վահան Զատիկյանի 60-ամյակի հիշատակին (լուսանկարներ)

Հայ ժողովուրդը ճակատագրական պահին միշտ էլ իր ծոցից առաջ է բերել նվիրյալ հայորդիների մի աստղաբույլ, ովքեր անմնացորդ նվիրվել են հարազատ ժողովրդի առջև ծառացած խնդիրները լուծելու վեհ առաքելությանը: Այդ նվիրյալների մեջ է նաև պետական, հասարակական և քաղաքական գործիչ, «Մալաթիա» Երկրապահ կամավորական ջոկատի հիմնադիր հրամանատար, երջանակահիշատակ Վահան Զատիկյանը:

Զատիկյանը ծնվել է 1956թ-ին Ջավախքի Լոմատուրցխ գյուղում, այնուհետև ընտանիքի հետ միասին բնակություն հաստատել Երեւանում: Վահան Զատիկյանն ըմբշամարտիկ էր, ըմբշամարտի Հայաստանի ֆեդերացիայի նախագահ: Զինվորագրվելով հայ ժողովրդի ազգային- ազատագրական պայքարին՝ Վահան Զատիկյանը անվերապահորեն հավատում էր հաղթանակին, հավատում էր, որ Հայաստանից նենգորեն խլված Արցախը նորից վերադառնալու է մայր հայրենիքի գիրկը:

Մալաթիա-Սեբաստիա համայնքի բնակչությունը, վստահելով իր նվիրյալ, կազմակերպիչ ու իր գործունեությամբ հավատ ներշնչող զավակին, նրան անկախ պետականության առաջին տարիներին՝ 1991թվականին ընտրեց համայնքի ղեկավար, ապա և ԱԺ պատգամավոր: Արցախյան ազատամարտի հերոս հրամանատարը, զինադադարից հետո ամբողջությամբ նվիրվում է իր համայնքի սոցիալ-տնտեսական խնդիրների կարգավորմանն ու բնակչության կենցաղային վիճակի բարելավմանը, մշտապես ուշադրության կենտրոնում պահելով ազատամարտիկներին ու նրանց ընտանիքներին: Վահան Զատիկյանը հաճախ իր ելույթներում նշել է, որ երկրապահությունը, ազատամարտիկը անգնահատելի հասկացություններ են, արժեք են:

Վահան Զատիկյանն ազգանպաստ գործունեության համար արժանացել է թե կառավարական, թե գերատեսչական պարգևների: Նա նաեւ ԵԿՄ բարձրագույն պարգև «Սպարապետ Վազգեն Սարգսյան» շքանշանի ասպետ է: Վահան Զատիկյանի անունով է կոչվում իր իսկ ազատագրած Բերձոր քաղաքի թիվ 2 դպրոցը, ուր հաճախ են լինում երկրապահները, օգնում դպրոցին՝ կահավորման և գրականության հարցում: Զատիկյանի անվան դպրոցի մերձակա հրապարակում՝ Երևան-Ստեփանակերտ մայրուղու մոտ է գտնվում Վահան Զատիկյանի կիսանդրին:

Վահան Զատիկյանի ծննդավայրի դպրոցը նույնպես կրում է նրա անունը: Մալաթիա-Սեբաստիա համայնքում, վաղամեռիկ համայնքապետի նախաձեռնությամբ հիմնադրված այգում տեղադրված է նրա կիսանդրին, որը ուխտատեղի է դարձել համայքի բնակչության, երկրապահների ու նոր սերնդի համար: Այս տարի անցկացվեց Վահան Զատիկյանի անվան 17-րդ միջազգային հուշամրցաշարը, որին մասնակցում էին Հայաստանի, Վրաստանի և Հանրապետության տարբեր մարզերի մարզական ակումբների պատանի ըմբիշները:

Քաջ հայորդու 60-ամյակի կապակցությամբ հիշատակի և խնկարկման ցերեկույթ էր կազմակերպվել իր անունը կրող դպրոցում: Կազմակերպիչը Երկրապահ կամավորականների միությունն էր, մասնակցում էին ներկայացուցիչներ պաշտպանության նախարարությունից, մտավորականության, մարզաշխարհի տարբեր խավերից:
Միջոցառման մասնակիցները ծաղկադրում արեցին Մալաթիա-Սեբաստիա համայնքի՝ Վահան Զատիկյանի անունը կրող զբոսայգում, ինչպես նաև՝ Եռաբլուրում, որտեղ ամփոփված է հերոս հայորդու աճյունը:

Լուսանկարները՝ ԼՈՒՐԵՐ.com-ի