«Մեծ Ութնյակի» հիմնական նպատակն էր դիմագրավել արեգակնային խավարման խոշոր հարվածներին. աստղաբան

Երեկ տեղական ժամանակով մոտավորապես ժամը հինգին տեղի ունեցավ արեգակի օղակաձև խավարում, որն անցավ Երկվորյակի և Աղեղնավորի ուղեծրի ներքո, իսկ այս տարի ընդհանուր առմամբ տեղի կունենա լուսնի և արևի երեք խավարում: Այս մասին այսօր լրագրողների հետ հանդիպման ժամանակ ասաց աստղաբան-էզոթերիկ Գուրգեն Հովհաննիսյանը: Նրա խոսքերով, այս խավարումը երևացել է Չինաստանի հարավային մասում, Ճապոնիայում և ԱՄՆ-ում: Գուրգեն Հովհաննիսյանի կարծիքով, բոլորովին պատահական չէր նաև այս շրջանում Մեծ ությակի հանդիպումը, որի հիմնական նպատակն էր դիմագրավել այս խավարումների խոշոր հարվածներին:

«Երկվորյակ, Աղեղնավոր ուղեծրով անցնելով՝ արեգակի տվյալ խավարումն իրենից խորհրդանշում է, որ շատ մեծ լարվածություն է սպասվում հատկապես այն երկրներին, որոնք գտնվում են տվյալ նշանների ներքո: Երկվորյակի նշանի տակ են գտնվում Հայաստանը և Եգիպտոսը, իսկ Աղեղնավորի՝ Իսպանիան, Սլովակիան և Հունգարիան»: Հետևաբար, եզրակացնում է աստղաբան-էզոթերիկը, այս երկրներում որոշակի լարվածություններ են սպասվում։ «Լարվածություն ասելով՝ ի նկատի ունեմ այն իրադարձությունները, որոնք ունեցել են ժամանակին ինչ-որ ընթացք և սառեցվել են կամ, որ նոր տեղի պետք է ունենան, սրանք կունենան իրենց ընթացքը, իսկ այդ ընթացքը կանցնի լարվածությամբ: Եգիպտոսում լարվածությունը կա և այն կշարունակվի, վստահաբար կարող ենք ասել, որ Հայաստանում ավելի կայուն կլինի, քանի որ Երկվորյակի նշանի բնութագրից ելնելով, եթե մի կողմը վատ է լինում, մյուս կողմը համեմատաբար պետք է լինի հնարավորինս լավ», - նշեց աստղաբան-էզոթերիկը:

Խոսելով հաջորդ խավարման մասին՝ նա նշեց, որ այն սպասվում է հունիսի չորսին՝ լուսնի մասնակի խավարում, որը ևս կանցնի Երկվորյակ և Աղեղնավոր ուղեծրի ներքո։ Այն այս պարագայում ավելի թեթև և հանգիստ է անցնում, քանի որ լուսնի խավարումները կտրականապես տարբերվում են արեգակնային խավարումներից, իսկ մեր պարագայում դրանք նույնիսկ օգտակար են։ Աստղաբանը խոսել է նաև արևի խավարումներից։ Ըստ նրա՝ մյուս խավարումն արդեն արեգակնային լրիվ խավարումն է, որը տեղի կունենա նոյեմբերի 13-ին: Սա իբր համարվում է ամենաբարդը, ամենածանրը, որովհետև արեգակի լրիվ խավարումն արդեն բավական լուրջ իրադարաձությունների է հանգեցնում: «Այդ խավարումը երևալու է Ավստրալիայում և Նոր Զելանդիայում և հետևաբար ազդեցությունն էլ կկրեն այս երկրները: Ազդեցությունները կլինեն վատ, ֆինանսատնտեսական և սոցիալական իրավիճակի կտրուկ վատթարացում, ինչ-որ ագրեսիայի դրսևորումներ կարող են լինել», - նշեց Գուրգեն Հովհաննիսյանը՝ հավելելով, որ Հայաստանում ոչ մի խավարում չի երևալու և դրանք բավական մեղմ են անցնում և ամենագլխավորը արեգակնային խավարումներն են, որոնք մենք լավ շրջանցում ենք: Աստղաբանը, սակայն, չի մասնավորեցրել, թե հատկապես ինչի շնորհիվ է, որ Հայաստանը միշտ «բարեհաջող» շրջանցում է բոլոր վատ երևույթների ազդեցությունը։

Մեր կողմից ընթերցողներին հիշեցնենք, որ մ.թ.ա. 585 թվականի մայիսի 28-ին Հալիս գետի մոտ մարերի և լյուդիացիների պատերազմի ամենաթեժ պահին սկսված արեգակնային խավարումը «հանգեցրել է» պատերազմի դադարեցմանը և մշտական հաշտության կնքմանը։