Լևոն Ալթունյանն ընդունել է Բելառուսի դեսպանին

ՀՀ առողջապահության նախարար Լևոն Ալթունյանն ընդունել է Բելառուսի դեսպանին:

Բելառուսի և Հայաստանի առողջապահության նախարարությունների համագործակցությունն ընթանում է 2005 թվականին ստորագրված համաձայնագրի շրջանակում:

Ոչ միայն ամենամսյա փոխտեղեկատվություն է իրականացվում վարակիչ հիվանդությունների, այլև կազմակերպվող գիտաժողովների և սեմինարների վերաբերյալ: Կողմերը համագործակցում են դեղերի գրանցման ոլորտում, աշխատանքներ են տարվում համատեղ տարբեր ծրագրերի իրականացման ուղղությամբ։

ՀՀ առողջապահության նախարար Լևոն Ալթունյանի և Հայաստանի Հանրապետությունում Բելառուսի արտակարգ և լիազոր դեսպան Իգոր Նազարուկի հանդիպման ընթացքում, կարևորելով արդեն իսկ կայացած և նախանշվող համատեղ ծրագրերը, համաձայնություն է ձեռք բերվել նոր բովանդակություն և թափ հաղորդել առողջապահության ոլորտում երկու երկրի համագործակցությանը։
Նշվել է, որ թե՛ Հայաստանը, թե՛ Բելառուսը առողջապահության առանձին ոլորտներում միմյանց համար ուսանելի լուրջ ձեռքբերումներ են արձանագրել։

Լևոն Ալթունյանին շնորհավորելով և հաջողություններ մաղթելով նախարար նշանակվելու կապակցությամբ' Իգոր Նազարուկը շեշտել է, որ առողջապահության ոլորտն ամենուր մեծ ուշադրության կենտրոնում է և մշտապես մեծ պահանջներ են դրվում պատասխանատուների առջև։

Դեսպանը պատրաստակամություն է հայտնել նպաստելու երկու երկրի համագործակցության ընդլայնման ու զարգացման գործին։
Նախարար Ալթունյանը, կարևորելով ձեռք բերվածը, նշել է, որ համագործակցությունն այսուհետև առավել արդյունավետ կլինի։