Բագրատաշենի անցակետն այսուհետ պարզեցված ընթացակարգերով է ընդունելու ՀՀ քաղաքացիներին

Նոր սարքավորումներով եւ ենթակառուցվածքներով հագեցած Բագրատաշենի անցման կետն արդեն պատրաստ է ընդունել Հայաստանից Վրաստան մեկնող ՀՀ քաղաքացիներին՝ առաջարկելով նրանց ավելի պարզ ընթացակարգեր համեմատաբար ավելի կարճ ժամանակահատվածում:

Դեռեւս 2012 թվականին ՀՀ կառավարության եւ ՄԱԿ-ի զարգացման ծրագրի միջեւ ստորագրված «ՀՀ պետական սահմանի «Բագրատաշեն», «Բավրա», «Գոգավան» անցման կետերի արդիականացում ծրագրի շրջանակում վերազինված Բագրատաշենի անցակետի բացման պաշտոնական արարողությանը մասնակցելու նպատակով Տավուշի մարզ էր մեկնել ՀՀ նախագահ Սերժ Սարգսյանը:

Բացմանը մասնակցում էին նաեւ Վրաստանի վարչապետ Գիորգի Կվիրիկաշվիլին, Հարավային Կովկասում Եվրոպական ներդրումային բանկի տարածաշրջանային ներկայացուցչության ղեկավար Սեբաստիեն Հուսոն դե Սամպինին, միջազգային կազմակերպությունների ներկայացուցիչներ եւ այլք:

ՀՀ ԿԱ պետական եկամուտների կոմիտեի նախագահ Վարդան Հարությունյանը, ով նույնպես ներկա էր անցակետի բացմանը, տեղեկացրեց, որ Բագրատաշենի անցակետի բացմանը զուգահեռ շահագործման կհանձնվի Գոգավանի, իսկ մինչեւ տարեվերջ՝ նաեւ Բավրայի անցման կետը:

«Շրջել եմ այս շենքի տարածքում: Կառուցվել է արդիական մաքսակետ, նախորդի հետ համեմատելու եզրեր նույնիսկ գտնել չեմ կարող: Համոզված եմ, որ մյուս երկուսն էլ նման բարձր մակարդակով մաքսակետեր են լինելու: Մոտ ապագայում մենք կունենանք մեկ պատուհանին հասնելու գաղափարը, եւ ժողովուրդը մաքսավորի ներկայությունը հնարավորինս քիչ կզգա: Այդ սարքավորումների առկայության դեպքում մենք պետք է մարդկային գործոնը հասցնենք նվազագույնի»,-լրագրողների հետ զրույցում ասաց Պետեկամուտների կոմիտեի նախագահը:

ՀՀ պետական սահմանի անցակետերի արդիականացման ծրագիրը մեկնարկել է դեռեւս 2010 թվականին ՀՀ սահմանային անվտանգության եւ պետական սահմանի համալիր կառավարման ռազմավարություն հաստատելու մասին ՀՀ նախագահի կարգադրությամբ, որին հաջորդել է 2011 թվականին այդ ռազմավարության իրականացմանն ուղղված 2011-2015 թվականների միջոցառումների ծրագրի հաստատումը:

Ծրագրով նախատեսվել էր նախ եւ առաջ կազմակերպել «Բագրատաշեն», «Բավրա», «Գոգավան» անցման կետերի արդիականացումը: Ծրագրի ընդհանուր բյուջեն կազմում է 52.13 մլն եվրո: