Իրաքյան բանակը մոտեցել է Մոսուլի օդանավակայանին

Մոսուլի համար ԴԱԻՇ-ի դեմ պայքարող իրաքյան զորքերը մոտեցել են քաղաքային օդանավակայանին: Այս մասին հայտնում է Reuters-ը՝ հղում անելով գործողության հրամանատարությանը:

Տիգրիս գետի արևմտյան ափի երկայնքով գրոհի ընթացքում Իրաքի ռազմաօդային ուժերի ուղղաթիռների աջակցությամբ ուժայիններն օդանավակայանին մոտեցել են 4 կմ հեռավորության վրա: Զինվորականներին նաև հաջողվել է վերահսկողության տակ վերցնել Մոսուլից 15 կմ հարավ գտնվող Համամ ալ-Ալիլ քաղաքի կենտրոնը՝ միաժամանակ չնշելով՝ արդյոք հաջողվել է բնակավայրն ամբողջովին ազատագրել ահաբեկիչներից:

Միաժամանակ, ԴԱԻՇ-ում հայտարարում են իրաքյան բանակի ուժերի շրջանում մեծաթիվ կորուստների մասին: Գրոհայինների պնդմամբ՝ միայն մեկ օրում զինվորականները 150 զոհ են տվել, նաև կորցրել են 29 հատ Humvee զրահապատ ավտոմեքենա, երկու «Աբրամս» տանկ և մի քանի միավոր այլ տեխնիկա: Սոցցանցերում տարածված կադրերում երևում է մեծ թվով ոչնչացված զրահամեքենա:

Բացի դրանից՝ պնդում են, որ գրոհայինները գրավել են 11 Humvee և 5 Cougar զրահամեքենա: