Աղձքի դպրոցի տնօրենին ազատել են պաշտոնից՝ գյուղը ոտքի է կանգնել

Աղձք գյուղի դպրոցի տնօրենին աշխատանքից ազատելը մեծ աղմուկ է բարձրացրել գյուղում: Դպրոցի աշակերտները և նրանց ծնողները հավաք են կազմակերպել՝ պահանջելով իր պաշտոնում վերականգնել աշխատանքից հեռացված տնօրենին: Բողոքի դուրս եկած քաղաքացիներին հանդարտեցնել չի հաջողվել անգամ Արագածոտնի մարզպետին:

ԼՈւՐԵՐ.com-ի թղթակցի հետ զրույցում Աղձք գյուղի դպրոցի տնօրեն Հարություն Սուքիասյանը նշեց, որ իրեն ազատել են պաշտոնից՝ ժամկետի ավարտի կապակցությամբ, առանց նախապես զգուշացնելու: Իր ազատման մասին լուրն ինքն իմացել է ուրիշից, քանի որ աշխատանքից հեռացման վերաբերյալ համապատասխան ծանուցում չի ստացել:

«Ինձ զանգահարեց ընկերներիցս մեկը, ասաց՝ աշխատանքից ազատվել ես, ձայն էլ չես հանում, այդ ժամանակ իմացա, որ ազատվել եմ աշխատանքից: Ազատմանս վերաբերյալ պաշտոնական ծանուցում չեմ ստացել», - ասաց դպրոցի տնօրեն Հարություն Սուքիասյանը:

ԼՈւՐԵՐ.com-ի այն հարցին, թե՝ ո՞ր դեպքում կրկին կստանձնի տնօրենի պաշտոնը, Հարություն Սուքիասյանը պատասխանեց. «կվերադառնամ միայն իմ մանկավարժական կոլեկտիվի ցանկության դեպքում»:

Բողոքի դուրս եկած մանկավարժներին, դպրոցականներին այսօր հանդիպել է նաև մարզպետը: Այս մասին մեզ տեղեկացրեց մարզպետարանի տեղեկատվության և հասարակայնության հետ կապերի բաժնի պետ Սաթենիկ Զորյանը.

«Այսօր մարզի ղեկավարը՝ մարզպետ Գաբրիել Գյոզալյանը, եղել է դպրոցում, հանդիպել է ուսուցիչների և ծնողների հետ և պարզաբանել է, որ ամեն ինչ եղել է օրենքի սահմաններում: Քանի որ նախկին տնօրենի պաշտոնավարման ժամկետը լրացել էր, սահմանված կարգի համաձայն՝ ժամանակավոր պաշտոնակատար է նշանակվել, մինչև որ մրցույթ կհայտարարվի»:

Հարցին՝ ինչո՞ւ Հարություն Սուքիասյանին նախապես ծանուցում չեն ուղարկել, Սաթենիկ Զորյանը պատասխանեց.

«Երբ պայմանագրի պաշտոնավարման ժամկետը լրանում է, ինքնաբերաբար, մնացած գործընթացները կատարվում են օրենքի սահմաններում: