Ոստիկանությունը հաստատում է. Սոթքի ոսկու հանքավայրում կրակոցներ են հնչել. կա ձերբակալված

Այսօր՝ դեկտեմբերի 2-ին, կրակոցներ են հնչել Սոթքի ոսկու հանքավայրում:

Այս տեղեկությունը ԼՈւՐԵՐ.com-ի թղթակցի հետ զրույցում հաստատել են ոստիկանության հասարակայնության հետ կապերի և լրատվության բաժնից: 

«Իրականացված միջոցառումների արդյունքում կրակողը վնասազերծվել է և ձերբակալվել»,- տեղեկացրին ոստիկանության լրատվության բաժնից:

Հարցին՝ տուժածներ կան, թե՝ ոչ, պատասխանեցին. «քննություն է կատարվում, հանգամանքները դեռ պարզվում են»:

Ավելի ուշ ոստիկանության լրատվական ծառայութունը դեպքի առնչությամբ մանրամասներ հաղորդեց. «Դեկտեմբերի 1-ին, ժամը 23-ի սահմաններում, Սոթքի ոսկու հանքի տարածքում 1985 թ. ծնված Վահագն Մ.-ն «ԱԿՄ» տիպի, 7.62 մմ տրամաչափի ինքնաձիգից կրակ է արձակել նույն հանքի անվտանգության աշխատակից, 1981 թ. ծնված Յուրի Մ.-ի ուղղությամբ, որը ձախ ոտքի թաթային մասում ստացած հրազենային վնասվածքով տեղափոխվել է հիվանդանոց:

Ոստիկանության ծառայողների ձեռնարկած օպերատիվ-հետախուզական անհետաձգելի միջոցառումների արդյունքում հաջողվել է զինաթափել և ձերբակալել Վահագն Մ.-ին:

Հանցագործության գործիք ինքնաձիգը և 1 փամփշտատուփը՝ 19 փամփուշտով, առգրավվել են:
Կատարվում է քննություն»: