«Հայաստանը Ռուսաստանի դաշնակիցը չէ, Հայաստանը Ռուսաստանի պատանդն է». քաղաքագետ

Սանկտ Պետերբուրգում դեկտեմբերի 25-ին տեղի ունեցավ ՀԱՊԿ գագաթնաժողովը, որի ժամանակ նորից հետաձգվեց այդ կազմակերպության գլխավոր քարտուղարի պաշտոնում Հայաստանի ներկայացուցչի նշանակման հարցը: Սա արդեն հայ պաշտոնյայի նշանակման ձգձգման երրորդ դեպքն է:

Ո՞վ, կամ ովքե՞ր չեն ցանկանում, որ ՀԱՊԿ քարտուղար դառնա Հայաստանի ներկայացուցիչը և ի՞նչ վտանգներ են թաքնված այս խորհրդավոր հետաձգումների հետևում:

Թեմայի շուրջ ԼՈւՐԵՐ.com-ը զրուցեց քաղաքագետ Ռուբեն Մեհրաբյանի հետ:

«Հայաստանի ներկայացուցչի նախագահությունն այդ անլուրջ կազմակերպության մեջ, չեմ կարծում, որ կարող է որևէ բան փոխել. Դա կրում է ձևական բնույթ, և որոշակի քաղաքական փոփոխություններ ենթադրել չի կարող»,-ասաց Մեհրաբյանը:

Ըստ մեր զրուցակցի՝ բոլորովին անհիմն էին բերված պաշտոնական պատճառաբանությունները մեր ներկայացուցչի նշանակման հետաձգման հետ կապված. «Անլուրջ կազմակերպությանը հարիր անլրջությամբ էլ բացատրություն տրվեց' իբր ՀԱՊԿ գլխավոր քարտուղարի պաշտոնում Հայաստանի ներկայացուցչի նշանակման հարցի  հետաձգման հետ կապված, և նման պարզաբանումներն ուղղակի մանկամտություն են»:

Դիտարկմանն՝արդյոք Ադրբեջանը, չլինելով ՀԱՊԿ  անդամ կփորձի քայլեր ձեռնարկել ընդդեմ այդ կառույցում Հայաստանի նախագահության, պարոն Մեհրաբյանը պատասխանեց. «Մեր, այսպես կոչված դաշնակիցներից ոչ մեկն էլ հանուն Հայաստանի՝ պատրաստ չէ փչացնել իր անձնական հարաբերությունները՝ Ալիևի հետ: Նրանք բոլորը բռնապետեր են և չեն ուզում իրենց բռնապետական ակումբում ակումբակից Ալիևի հետ հարաբերություններ պարզել»:

Ըստ քաղաքագետի՝ ասվածի վկայությունն է նաև հայ-ռուսական ռազմաքաղաքական համագործակցությունը, որը եկավ ապացուցելու, որ Ռուսաստանը չի կարող մեր անվտանգության երաշխավորը լինել. «Բազմիցս նշել եմ՝ Ռուսաստանը մեր թիվ մեկ անվտանգության սպառնալիքն է, իսկ Հայաստանը Ռուսաստանի դաշնակիցը չէ, Հայաստանը Ռուսաստանի պատանդն է»:

Անդրադառնալով Իրան-ԵՏՄ ազատ առևտրի համաձայնագրին, որի մասին ՀԱՊԿ-ում ելույթ ունեցավ նախագահ Սերժ Սարգսյանը, քաղաքագետը հավելեց. «Իրան-Հայաստան հարաբերությունները կապ չեն կարող ունենալ ԵՏՄ-ի հետ, և ՀԱՊԿ-ում այդ հարցի քննարկումը պայմանավորված էր Ռուսաստանի կայսերապաշտական նկրտումներով»,-իր խոսքը եզրափակեց Ռուբեն Մեհրաբյանը՝ հավելելով, որ ՀԱՊԿ-ում լուրջ հարցեր չեն կարող լուծվել, քանի որ այն ճիշտ և ճիշտ կրկնում է ԱՊՀ-ին:

Աղավնի Սուքիասյան