Ամենայն Հայոց Կաթողիկոսը պատգամ է հղել

Ն.Ս.Օ.Տ.Տ. Գարեգին Բ Ամենայն Հայոց Կաթողիկոսը պատգամ է հղել Սուրբ Ծննդյան և Աստվածահայտնության տոնի առթիվ։

Ինչպես հայտնում են Մայր Աթոռ Սուրբ Էջմիածնի տեղեկատվական համակարգից, Ամենայն Հայոց Կաթողիկոսն ասել է.

«Յանուն Հօր եւ Որդւոյ եւ Հոգւոյն Սրբոյ. ամէն:

«Եւ մի՛ կերպարանիք կերպարանաւք աշխարհիս այսորիկ. այլ նորոգեցարո՛ւք ի նորոգութիւն մտաց ձերոց, առ ի քննել ձեզ զլա՛ւն եւ եթէ զինչ են կամքն Աստուծոյ, բարին եւ հաճոյն եւ կատարեալ»

(Հռոմ. ԺԲ 2):

Սիրելի բարեպաշտ ժողովուրդ,

Մեր Տիրոջ Սուրբ Ծննդյան բերկրանքով այսօր գոհաբանություն ենք բարձրացնում առ Աստված: Փառաբանում ենք Բեթղեհեմում ծնված Հիսուս Մանկանը, Ով աշխարհ եկավ փրկելու կորստյան մատնված մարդկությանը:

Աստծո կողմից արարված աշխարհում առաջին մարդը՝ Ադամը, աստվածային պատվիրանը խախտելով, ընթացավ Աստծո կամքին հակառակ, զրկվեց շնորհներից ու պարգևներից Արարչի: Ադամով մեղքը սկիզբ առավ մարդկային կյանքում, և մահը մուտք գործեց աշխարհ: Աստված, սակայն, Իր արարչական սիրով ու ողորմածությամբ նոր իրականություն կերտեց մարդկության համար: Ի լրումն ժամանակի աշխարհ առաքեց Իր Միածին Որդուն՝ քավելու մարդկության մեղքը և պարգևելու հավիտենական կյանք: Քրիստոսով նորոգվեց մեղքերով փոթորկվող աշխարհը, մարդկանց տրվեց նոր արարած լինելու շնորհը, աշխարհում խաղաղություն, սեր և հաճություն հաստատելու պատգամը: Տիրոջ փրկագործության իրողության առջև Պողոս առաքյալը հորդորում է. «Այս աշխարհի կերպարանքով մի՛ կերպարանվեք, այլ նորոգվեցեք ձեր մտքի նորոգությամբ, որպեսզի դուք քննեք լավը, և թե ի՛նչ է Աստծու կամքը՝ բարին և հաճելին և կատարյալը»:

Առաքյալի այս խոսքերը արտահայտում են ոգին Ավետարանի, որի քարոզությունը աշխարհում արգասավորեց Քրիստոսով նորոգության ուղին՝ փոխակերպելով մարդկային կյանքեր, փոխակերպելով հասարակություններ, արմատավորելով մտածողությունը համընդհանուր բարօրության և աշխարհում արդարության ու խաղաղության հաստատման: Ցավալիորեն, սակայն, Աստծուն հակառակ մեղսագործ ընթացքները շարունակվում են: Չեն դադարում պատերազմները, հակամարտություններն ու ահաբեկչությունները, ոտնահարվում են մարդկային իրավունքները, արդար դատապարտություն չեն գտնում ցեղասպանություններն ու մշակութային եղեռնագործությունները: Ընչաքաղցությունը, հարստանալու մարմաջը մղում են խաբեության ու չարաշահումների, պատճառ դառնում մարդկային ողբերգությունների, առաջնորդում հասարակության բևեռացման, սոցիալական անարդարության: Գթասրտության և ազնվության կողքին ականատես ենք ատելության և նենգադավության, խոնարհության և ծառայանվիրումի հանդիման՝ փառասիրության և իշխանատենչության մոլուցքների: Այս բոլոր վերքերի վրա Քրիստոսի մարդեղության խորհուրդը պարզում է հույսը նորոգության, որպեսզի Պողոս առաքյալի խոսքի համաձայն՝ մարդիկ քննեն լավը «և թե ի՛նչ է Աստծու կամքը՝ բարին և հաճելին և կատարյալը» և ապրեն աստվածահաճո իրագործումներով:

Աստվածային կամքին համաձայն ընթացքն է կանգուն պահում աշխարհը և կյանքը զարդարում սիրով, խաղաղությամբ, արդարությամբ, ճշմարտությամբ, որոնք Աստված շարունակ աճեցնում է հավատավոր հոգիներում: Քրիստոսով նորոգության վկայությունն է, որ մենք՝ իբրև քրիստոնյաներ, պիտի բերենք աշխարհում: Քրիստոնյայի կյանքը ներգործուն առաքելություն է մարդկանց և աշխարհի հանդեպ: Քրիստոսի փրկագործությունը օրինակ է համամարդկային և ազգային բարիքի հաստատման մեջ տեսնելու սեփական առաքելությունը և միասնության մեջ կերտելու երջանկության, առաջընթացի, ձեռքբերումների ուղիները: Այսպես կյանքը ինքնանպատակ լինելուց դառնում է նվիրում, աշխատանքը՝ արարում, գիտությունը, տաղանդը՝ համընդհանուր բարիք, իշխանությունը՝ ծառայություն ժողովրդին, իսկ մարդու երկրավոր, անցողիկ կեցությունը՝ բաղձանք ու ձգտում դեպի հավիտենություն:

Նորոգության ավետարանական պատգամը և առաքելական հորդորը մշտահունչ և կենսունակ են մեր ժողովրդի համար: Ավետարանով նորոգյալ կյանքը դարեր շարունակ մեր ազգին պարգևել է հավատքի զորություն, հոգու ամրություն ու արիություն՝ դիմակայելու փորձությունների, համբերելու նեղությունների և արարելու գրո հիշատակի արժանի գործեր: Նույն ոգով այսօր դիմագրավում ենք հայրենի մեր երկրի անօրինական շրջափակմանը, կյանքեր խլող սադրիչ ռազմական գործողություններին, հաղթահարում մեր առջև ծառացած դժվարությունները, դիմակայում մարտահրավերներին և ջանքեր բերում՝ կերտելու խաղաղ ու բարօր կյանքը մեր ժողովրդի, սատար կանգնելու Մերձավոր Արևելքում պատերազմական դժվարությունները կրող մեր քույրերին ու եղբայրներին: Ներկա հիմնախնդիրների, նեղությունների հանդիման Քրիստոսի Ծննդյան և Աստվածահայտնության տոնը կյանքի նոր արշալույս է բացում, ջերմացնում մեր հոգիները և հավելում հույս ու լավատեսություն:

Փրկչի Ծննդյան ու Աստվածհայտնության խորհրդի առջև այսօր առաքելական նույն հորդորն ենք բերում, սիրելի բարեպաշտ ժողովուրդ, Աստծո կամքին հետևելու, բարին ընտրելու, դեպի կատարյալը ընթանալու, տոգորվելու կյանքը բարեփոխելու վճռականությամբ ու նախանձախնդրությամբ: Պահպանենք մեր սրտերը որպես բեթղեհեմյան գողտրիկ անձավներ աստվածային ներկայության՝ լինելու Փրկչին ճշմարտապես երկրպագողներ, ողորմած, արդարամիտ ու եղբայրասեր: Զորանանք Տիրոջով, որ կարող լինենք իրականություն դարձնել մեր հույսերը, իրագործել ազգային մեր նպատակները: Մեր հոգիներում վառ պահենք հավատքը՝ որպես առ Տերն առաջնորդող բեթղեհեմյան աստղալույս և իմաստուն մոգերի պես մեր կյանքի ճանապարհը միշտ դարձնենք հավատարմություն ու նվիրում առ Տերը մեր Հիսուս Քրիստոս, հավատարմություն ու նվիրում առ Հայրենին և Առաքելական մեր Սուրբ Եկեղեցին:

Քրիստոսի Սուրբ Ծննդյան բերկրալի ավետիսով եղբայրական ողջույն ենք հղում և Մեր բարեմաղթանքները բերում Առաքելական մեր Սուրբ Եկեղեցու Նվիրապետական Աթոռների Գահակալներին՝ Ն. Ս. Օ. Տ. Տ. Արամ Ա Մեծի Տանն Կիլիկիո Կաթողիկոսին, Երուսաղեմի Հայոց Պատրիարք Ամենապատիվ Տ. Նուրհան արքեպիսկոպոս Մանուկյանին, Կոստանդնուպոլսի Հայոց Պատրիարք Ամենապատիվ Տ. Մեսրոպ արքեպիսկոպոս Մութաֆյանին և մեր Եկեղեցու ողջ հոգևոր դասին: Մեր ջերմ ողջույնն ենք հղում և Մանուկ Հիսուսի փրկարար շնորհները հայցում քույր Եկեղեցիների հոգևոր Պետերին և նրանց հավատավոր հոտին:

Մեր ողջույնն ենք հղում և Տիրոջ զորակցությունը մաղթում Հայաստանի Հանրապետության Նախագահ տիար Սերժ Սարգսյանին, Լեռնային Ղարաբաղի Հանրապետության Նախագահ Տիար Բակո Սահակյանին, Մեր օրհնությունն ու բարեմաղթանքներն ենք բերում Սուրբ Պատարագի արարողությանը ներկա Ազգային ժողովի նախագահին, վարչապետին, հայոց պետական ավագանուն և Հայաստանում հավատարմագրված դիվանագիտական առաքելությունների ներկայացուցիչներին: Հայրական Մեր սերն ու օրհնությունը՝ հավատավոր համայն Մեր զավակներին ի Հայաստան, Արցախ և ի Սփյուռս:

Սուրբ Ծննդյան տոնի այս նվիրական օրը աղոթք ենք բարձրացնում առ մարդացյալ Աստվածորդին ողջ աշխարհի խաղաղության, աշխարհասփյուռ մեր ժողովրդի բարօրության ու առաջընթացի համար: Հայցում ենք, որ Բարին Աստված մարդկանց սրտերից հեռացնի բռնության և ատելության որոմները և սերմանի սիրո և համերաշխության շնորհները՝ իրագործելու Աստծո կամքը՝ «բարին և հաճելին և կատարյալը»: Թող Տերը Իր օրհնության և Սուրբ Աջի ամենախնամ հովանու ներքո պահպանի մեր երկիրը, պայծառ պահի մեր Սուրբ Եկեղեցին և հավատքի ու հավատո գործոց շավիղներում առաջնորդի մեր կյանքը՝ փառաբանելու Իր Սուրբ Անունը այսօր և միշտ և հավիտյանս. ամեն:

Քրիստոս ծնաւ և յայտնեցաւ,

ձեզ և մեզ մեծ աւետիս: