1000 դրամի փոխարեն կվճարեն կրկնակի կամ եռակի. Օրենքով հաստատվեց

2016 թ. դեկտեմբերի 30-ին նախագահ Սերժ Սարգսյանը վավերացրել է «Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» կամ «1000 դրամի» պայմանական անուն ստացած նախագծի փաթեթը: Արդեն օրենքով՝ 2017 թ. հունվարի 9-ից, անկախ աշխատավարձի չափից՝ ՀՀ քաղաքացիները ամսական 1000 դրամի մասնաբաժին են հատկացնելու բանակին: Այս օրենքը չի տարածվում  նվազագույն աշխատավարձ ստացողների վրա:

ԼՈւՐԵՐ.com-ի խմբագրությանը դիմած քաղաքացին, ով մասնագիտությամբ հաշվապահ է, իր դժգոհությունն արտահայտեց Ամանորից մեկ օր առաջ նախագահի վավերացրած այս օրենքի վերաբերյալ՝ նշելով, որ օրենքի նախագծի և վերջնական տարբերակի միջև, կարծես թե գաղտնի կերպով, արվել է մի այնպիսի փոփոխություն, որն ի վնաս է ՀՀ քաղաքացիներին և կրում է մեծ կոռուպցիոն ռիսկեր.  «Օրենքի նախնական տարբերակում նշված էր, որ եթե քաղաքացին աշխատում է միաժամանակ մի քանի գործատուի մոտ, ապա պահանջվող 1000 դրամը վճարում է միայն մեկ գործատուից ստացվող եկամուտներից /Հոդված 11.3/: Սակայն, նախագծի վերջնական տարբերակում, որն արդեն օրենք է դարձել, եթե քաղաքացին աշխատում է միաժամանակ մի քանի գորածատուի մոտ, ապա նախ 1000-ական դրամներ գանձվելու են բոլոր գործատուներից, հետո այդ ֆիզիկական անձն իրավունք ունի օրենքի 11-րդ հոդվածի 5-րդ մասով սահմանված կարգով և ժամկետներում դիմելու Հիմնադրամ՝  մեկից ավելի հիմքով վճարված 1000-ական դրամները ստանալու համար»:

Հաշվի առնելով, որ Հայաստանում  քաղաքացիների որոշ հատված միաժամանակ աշխատում է երկու կամ ավելի գործատուների մոտ, նրանք, փաստորեն, ամեն ամիս վճարելու են կրկնակի կամ եռակի: Այս առումով՝ տարօրինակ է օրենքում սահմանված այն դրույթը, որ նրանք կարող են նախ վճարել, հետո էլ ետ պահանջել իրենց գումարները:  

«Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրենքով՝ մեկից ավելի հիմքով վճարված 1000-ական դրամները ստանալու համար քաղաքացիները պետք է ներկայացնեն համապատասխան տեղեկանքներ և դա էլ անեն սահմանված ժամկետում. հակառակ դեպքում՝ կարող են  հրաժեշտ տալ իրենց մի քանի հազար դրամին, քանի որ սահմանված ժամկետը խախտելու դեպքում Հիմնադրամը նրանց կարող է մերժել:

Հաշվի առնելով հայկական իրականությունը՝ վստահաբար կարող ենք ասել, որ նման մերժումներն ու բյուրոկրատական քաշքշուկները չեն բացառվի:

Իրականում, սակայն, պետությունը պետք է իր խնդիրները լուծի ոչ թե քաղաքացիների, այլ պետբյուջեի հաշվին: Բացի այդ, պետության խնդիրն է կանխել զինվորների վիրավորվելը և զոհվելը, իսկ զինվորի ընտանիքի կողքին կանգնելը, երբ նա այլևս չկա կամ վիրավոր է, սուրբ պարտականություն է, իսկ այն, որ այս օրենքը չի տարածվում ապրիլյան սրացման ժամանակ զոհվածների և վիրավոր զինվորների ընտանիքների վրա, պարզապես, ամոթ է: 

Աղավնի Սուքիասյան