Հրադադարի խախտման արդյունքում հայկական կողմն ունի մեկ զոհ և ծանր վիրավոր. ԼՂՀ ՊՆ

Հայկական կողմն ունի մեկ զոհ: Այս մասին ԼՈւՐԵՐ.com-ի հետ զրույցում ասաց ԼՂՀ Պաշտպանության նախարարության մամուլի խոսնակ Սենոր Հասրաթյանը: 

Նա նշեց, որ դիպուկահարի կրակոցից զոհվել է ՊԲ զինծառայող: Այլ մանրամասներ Հասրաթյանը չներկայացրեց, հավելելով, որ քիչ հետո պաշտոնական հաղորդագրություն կտարածեն:

Թարմացված

Ավելի ուշ տարածած ԼՂՀ ՊՆ պաշտոնական հաղորդագրության համաձայն՝ փետրվարի 8-ին՝ ժամը 11:00-ի սահմաններում, ՊԲ հյուսիսային ուղղությամբ տեղակայված զորամասերից մեկի պահպանության տեղամասում, հակառակորդի կողմից հրադադարի ռեժիմի խախտման արդյունքում, մահացու վիրավորում է ստացել ՊԲ պայմանագրային զինծառայող, 1979թ. ծնված Գեղամ Հենրիկի Մանուկյանը:

Դեպքի մանրամասները պարզելու համար կատարվում է քննություն:

ԼՂՀ պաշտպանության նախարարությունը կիսում է կորստյան ծանր վիշտը և իր զորակցությունը հայտնում զոհված զինծառայողի ընտանիքի անդամներին, հարազատներին և ծառայակիցներին:

Նույն օրը հակամարտ զորքերի շփման գծի մեկ այլ (Մարտակերտ) ուղղությամբ ժամը 12:00-ի սահմաններում, կրկին հակառակորդի կողմից հրադադարի ռեժիմի խախտման արդյունքում, ծանր վիրավորում է ստացել ՊԲ ժամկետային զինծառայող, 1988թ. ծնված Կորյուն Կամոյի Կիրակոսյանը:

Կատարվում է քննություն:

Ի դեպ՝ ԼՂՀ ՊՆ-ն նաև հերքել է Ադրբեջանի պաշտպանության նախարարության այն հայտարարությունը, թե իբր երեկ 16:55-ից սկսած ղարաբաղյան կողմը, օգտագործելով հրանոթներ և տարբեր տրամաչափի ականանետեր, արկակոծել է իրենց առաջնային դիրքերը, որպեսզի ղարաբաղա-ադրբեջանական շփման գոտու մեկ այլ ուղղությամբ ձեռնարկի դիվերսիոն ներթափանցման փորձ: