Հրաժեշտ Օսկանյանին

ՀՀ Մարդու իրավունքների նախկին պաշտպան Կարեն Անդրեասյանը ԼՈւՐԵՐ.com-ի հետ զրույցում խոսելով «Համախմբում» կուսակցությունը լքելու իր որոշման և դրա պատճառների մասին, նշեց, որ իր այդ որոշման հիմքում ընկած է եղել իր  և «Համախմբում» կուսակցության առաջնորդ Վարդան Օսկանյանի տեսակետների միջև առկա տարաձայնությունները. «Դե, եթե նա կիսեր իմ տեսակետը, դաշինքն ու դրա կազմն այլ տեսք կունենային: Մենք համաձայնութան եկանք քաղաքական իմաստով իրար հրաժեշտ տալու»,-նշեց Կարեն Անդրեասյանը՝ հավելելով, որ տեղյակ չէ անգամ՝ Վարդան Օսկանյանն իր դիմումն ընդունե՞լ է, թե՞ ոչ»:

Կարեն Անդրեասյանի փոխանցմամբ՝ կուսակցությունից դուրս գալու որոշում ներկայացրել է մեկ ամիս առաջ, և իր այդ որոշման պատճառը Վարդան Օսկանյանի ղեկավարած կուսակցության կողմից իրականացվող քաղաքական գործընթացների վերաբերյալ իր անհամաձայնությունն է. «Իմ  որոշման պատճառը կուսակցության կողմից իրականացվող քաղաքական որոշումներն էին: Ես չէի մասնակցում կուսակցության կողմից իրականացվող քաղաքական պրոցեսներին, դրա համար էլ որոշեցի հեռանալ, քանի որ անիմաստ էի համարում իմ մնալն այդ կուսակցությունում»:

Պատրաստվո՞ւմ է անդամակցել այլ կուսակցություններին հարցին՝ Կարեն Անդրեասյանը պատասխանեց. «Առաջիկայում չեմ պատրաստվում որևէ այլ կուսակցության անդամակցել և, ընդհանրապես, քաղաքական պրոցեսներին մասնակցելու համար՝ կարևոր չէ կուսակցական  լինելը»:

Հետևաբար, ինչպիսին է լինելու ընտրություններին մասնակցելու իր ձևաչափը հարցին ի պատասխան՝  Մարդու իրավունքների նախկին պաշտպանն ասաց. «Կմասնակցեմ որպես ընտրող և մարդ, ով անհանգստանում է երկրում կատարվող իրադարձություններով»:  

Աղավնի Սուքիասյան