Չհաշտվե՛լ, դիմե՛լ ՄԻԵԴ

«Կառավարվող քվեարկություն, կառավարվող քվեաթերթիկներ, բաց քվեարկություն, ընտրակաշառքների բազմաթիվ դեպքեր, ձայնագրություններ, քվեարկության բարդացված ընթացակարգ, սարքերի խափանումներ: Սրանք այն հիմնական թերություններն են, որոնք արձանագրվեցին երեկ կայացած խորհրդարանական ընտրությունների ժամանակ: Սրանց ավելանում են նաև ձախողված ուղիղ միացումները, որոնք տապալեցին ընտրատեղամասերում կատարվողին ուղիղ կապով հետևելու մեր հույսերը»,-այս մասին այսօր հրավիրված մամուլի ասուլիսի ժամանակ նշեց Գյումրիի «Ասպարեզ» ակումբի նախագահ Լևոն Բարսեղյանը: Վերջինս կոչ արեց հասարակությանը՝ չհաշտվել ընտրությունների արդյունքների հետ և արձանագրած խախտումներով դիմել տարբեր ատյաններ, այդ թվում՝ ՄԻԵԴ:

«Կոչ եմ անում ընտրությունների արդյունքներից բողոքող քաղաքացիներին և այդ ընտրության արդյունքները չընդունող քաղաքական ուժերին՝ չհաշտվել ստացված արդյունքների հետ և դիմել ՄԻԵԴ»:

Քննարկմանը ներկա բանախոսներից՝ «Իրազեկ քաղաքացիների միավորում» ՀԿ ղեկավար Դանիել Իոաննիսյանը նշեց, որ տեղամասերում գտնվող չգրանցված քաղաքացիները դրսևորել են անպարկեշտ վարքագիծ՝ չենթարկվելով անգամ դիտորդների կոչերին: 

«Տեղամասերի երեսուն տոկոսում եղել է ծեծ, վիճաբանություն, կռիվ, և հետաքրքական է, որ դրանք կարծես թե չէին նկատում տարածքում գտնվող ոստիկանները: Բազմաթիվ էին նաև ուղղորդված ընտրության դեպքերը, որոնց մասին ընտրական ողջ պրոցեսի ընթացքում մեր կազմակերպությունը ներկայացրել է թվեր և վիճակագրություն»,-նշեց Իոաննիսյանը: 

Վերջինիս խոսքով՝ ուղղորդված ընտրության եկած քաղաքացիների կուտակումները նկատելի էին հատկապես ապրիլի երկուսի առավոտյան ժամերին, երբ մեքենաներով քաղաքացներն բերում էին մեկ ընտրատարածք՝ հրահանգելով արագ-արագ մտնել ընտրատեղամաս և կատարել իրենց քվեարկությունը: 

Աղավնի Սուքիասյան