Լուսինե Զաքարյանն այսօր կդառնար 75 տարեկան

Հայ հոգևոր և կոմիտասյան երգերի անզուգական կատարող, ՀՍՍՀ ժողովրդական արտիստ, Պետական մրցանակի դափնեկիր Լուսինե Զաքարյանն այսօր կդառնար 75 տարեկան։ 

Ախալցխայում ծնված և ռուսական կրթություն ստացած երիտասարդ աղջիկն առաջին իսկ հանդիպումից իր ձայնով և ոգեղենությամբ այնպես էր գերել Ամենայն Հայոց Կաթողիկոս Վազգեն Առաջինին, որ Վեհափառը կարգադրել էր նրան անմիջապես ընդունել Մայր Աթոռի երգչախմբում։ «Երբ Լուսինեն երգում է «Սուրբ-սուրբը», ամբողջ հրեշտակները բազմությամբ իջնում են Մայր աթոռ ու փառաբանում Աստծուն իր այդ երգեցողության ու նրան ի վերուստ տրված շնորհի համար»,-Լուսինեի մասին ասէլ է Վազգեն Ա-ն։

Լուսինե Զաքարյանը ծնվել է 1937 թ. հունիսի 1-ին Ջավախքում, 1952 թ. ընտանիքի հետ տեղափոխվել Երևան և սովորել Ռոմանոս Մելիքյանի անվան երաժշտական ուսումնարանում, այնուհետև՝ Երևանի Կոմիտասի անվան պետական կոնսերվատորիայի Վոկալի բաժնում։ Թեև երգչուհու երգացանկում ընդգրկված են եղել նաև արտասահմանյան կոմպոզիտորների ստեղծագործություններ, ժողովրդը նրան հիշում է որպես հայ հոգևոր երաժշտության բացառիկ կատարող։

Հռոմի պապը բացառության կարգով Լուսինե Զաքարյանին արտոնել է երգել Փարիզի աստվածամոր տաճարում։

Լուսինե Զաքարյանի 75-ամյա հոբելյանի առթիվ այսօր՝ ժամը 12:00-ին, Եզնիկ Կողբացի 42 հասցեում՝ երգչուհու երևանյան բնակարանի շենքի պատին կտեղադրվի նրա հիշատակը հավերժացնող հուշատախտակ, որի հեղինակը քանդակագործ Հայկ Թոքմաջյանն է: Հուշաքարի ստեղծման գաղափարը արժանացել է նաև Ն.Ս.Օ.Տ.Տ. Գարեգին Բ Կաթողիկոսի հավանությանն ու հովանավորությանը:

Հուշատախտակի բացման արարողությանը կմասնակցեն ՀՀ մշակույթի նախարարության, Երևանի քաղաքապետարանի, Մայր աթոռ Սուրբ Էջմիածնի ներկայացուցիչները, երաժշտարվեստի անվանի գործիչներ ու մտավորականներ, երգչուհու երկրպագուները: