Աստղագետները ճշտել են Անդրոմեդայի և Ծիր Կաթնի բախման ժամանակը

Աստղագետները ստացել են Անդրոմեդա և Ծիր Կաթին (մեր գալակտիկան) ապագա բախման անխուսափելիության ամենաստույգ տվյալները։ Այս ծավալուն աշխատանքի արդյունքներն ամփոփվել են միանգամից երեք հոդվածներում, որոնք տպագրվել են The Astrophysical Journal պարբերականում։ Դրանց համառոտ բովանդակությունը բերվում է Nature News կայքում։

Անդրոմեդայի գալակտիկան (M31 միգամածություն, կամ Անդրոմեդայի միգամածություն) գտնվում է մեր աստեղային համակարգից 2.5 միլիոն լուսատարի հեռավորության վրա։ Այն մեզ ամենամոտ գալակտիկան է։ Գիտնականները վաղուց էին կանխատեսել, որ ապագայում այն կբախվի մերի հետ, սակայն այդ ենթադրությունը հաստատող հստակ փաստերը բացակայում էին։ Վարկածը, սակայն, բավականին տարածված է, այդ թվում՝ ֆանտաստիկ գրականության մեջ։

Աշխատանքի շրջանակներում գիտնականները վերլուծել են Անդրոմեդայի գալակտիկայում 12 հազար աստղերի շարժման ուղեծրերը։ Մասնավորապես, դոպլերյան շեղման չափմամբ նրանք կարողացել են պարզել ոչ միայն դրանց երկայնական, այլև լայնական (դեպի մեզ ուղղված) արագությունները։

Նոր տվյալները թույլ են տվել ճշգրտել բախման ժամանակը. այն տեղի կունենա մոտ 4 միլիարդ տարի հետո։ Նշենք, որ մինչ օրս ենթադրվում էր 3-5 միլիարդ տարի։ Ավելին, այս պրոցեսի հետագա համակարգչային մոդելավորումը թույլ է տվել հաստատել, որ այդ բախման արդյունքում Արեգակնային համակարգությունը դուրս կշպրտվի Ծիր Կաթնի ծայրամաս՝ 26 հազար լուսատարով ավելի հեռու, քան իր այժմյան դիրքն է։

Ընդ որում, 0.1% հավանականությամբ Արեգակնային համակարգությունը Գալակտիկայի կենտրոնից կհեռանա 160 հազար լուսատարով։ Հատկանշական է, որ մոդելավորումը ցույց է տվել, որ M33 գաճաճ գալակտիկան 9% հավանականությամբ կարող է ևս մինչև Անդրոմեդայի հետ բախումը, բախվել Ծիր Կաթնի հետ։