Չեմ կարծում, որ գրքի լույսը զիջում է մոմի լույսին. գրահրատարակիչ

«Մինչ մյուսները սուտ քարոզներ էին անում, մենք գիրք էինք տարածում ու փորձում ձևավորել գրքի ընկալման նոր մշակույթ»,- այսօր լրագրողների հետ հանդիպմանն ասաց գրականագետ Արքմենիկ Նիկողոսյանը՝ հավելելով, որ նորակազմ խորհրդարանից և կառավարությունից առանձնապես սպասելիքներ չունի։

«Անտարես» հրատարակչության տնօրեն Արմեն Մարտիրոսյանն ասաց, որ խորհրդարանական ընտրությունների քարոզարշավի ընթացքում իրենք ութ գիրք են լույս ընծայել։ Գրահրատարակչության ոլորտն այսօր մեծ խնդիրներ ունի, և ԱԺ նոր կազմով ամենևին չոգևորված Մարտիրոսյանն ասաց. 

«Այս որակով նա չէ, որ պետք է որոշի մեր խնդիրների ճակատագիրը, ամեն ինչ կախված է մեզնից: Որքան համառ ու հետեւողական կլինենք այս պայքարում, այնքան մեծ արդյունքներ կունենանք»։ Ոլորտի ամենալուրջ խնդիրներից մեկը, Մարտիրոսյանի կարծիքով, հարկային դաշտն է։

Գրահրատարակիչները ցանկանում են հարկային ոլորտում արտոնություններ ստանալ գրքի տպագրության համար։ «ԱԺ-ը եւ կառավարությունը գրքի նկատմամբ հատուկ վերաբերմունք պետք է ցուցաբերեն՝ հարկային դաշտը մեղմացնելով: Պետությունը պետք է ցույց տա, որ ինքը գրքի կողքին է: Օրինակ, այսօր մեր եկեղեցին ազատված է ավելացված արժեքի հարկից։ Եթե դա վատ է, ապա ինչո՞ւ է այդ վատը տարածվում եկեղեցու վրա, իսկ եթե լավ է, ապա եկեք մի հոգևոր բնագավառից այդ լավ փորձը տանենք մի այլ հոգևոր բնագավառ, որը գիրքն է, ու չեմ կարծում, որ գրքի լույսը որևէ բանով զիջում է մոմի լույսին»։