Մենք աշխարհից հայանպաստ դիրքորոշում չենք ուզում, այլ օբյեկտիվություն. Դավիթ Ջամալյան

«Տարիներ շարունակ բանակցային գործընթացների ժամանակ ադրբեջանական կողմը պատերազմը չվերսկսկելը ներկայացնում է իբրև մեծ փոխզիջում՝ շատ լավ հասկանալով, որ տարածաշրջանում շահեր ունեցող հզոր երկրներին որ մի պատերազմ ձեռնտու չէ։ Թերևս սրանով է պետք բացատրել, որ Քլինթոնի այցի նախօրեին ադրբեջանցիները հերթական անգամ փորձեցին կիրառել պատերազմի շանտաժի հնարքն ու ավելի լուրջ տպավորություն թողնելու համար առաջին գծում լարեցին դրությունը»,-լրագրողների հետ հանդիպման ժամանակ ասաց Դավիթ Ջամալյանը։

Միջազգային հանրության և կառույցների կողմից կտրուկ դատապարտող հայտարարությունների բացակայությունը փորձագետը բացատրեց այն հանգամանքով, որ յուրաքանչյուր պետություն մտածում է նախևառաջ սեփական շահի մասին։ «Քանի որ բոլորը գիտեն, որ Ադրբեջանը պատերազմի պատրաստ չէ, աչք են փակում ադրբեջանական փոքրիկ կապրիզների վրա։ Եթե ռեալ պատերազմի վտանգ տեսնեն՝ քայլեր կանեն, բայց մեր հույսն իրենք չեն, այլ մեր բանակը»,-ասաց փորձագետը։

Ջամալյանի կարծիքով՝ նույն կերպ էլ առայժմ չի արձագանքում ՀԱՊԿ-ը, քանի որ ՀՀ ԶՈՒ և Արցախի ՊԲ-ն լիովին ի զորու են վերահսկելու իրավիճակը, սակայն պատերազմի իրական սպառնալիքի դեպքում ՀԱՊԿ-ը ևս քայլեր կձեռնարկի։

Խոսելով արտգործնախարարության՝ ըստ էության ոչ համարժեք արձագանքի մասին՝ Ջամալյանն ասաց, որ պետք է ցուցաբերել նախաձեռնողական մոտեցում։ «Հայտարարություն արվեց, բայց միայն հայտարարություններով պետք չէ սահմանափակվել։ Գուցե պետք է ակտիվացնել դեսպանատների աշխատանքը։ Մեր պաշտպանվելու իրավունքի իրացման գաղափարն է պետք հասցնել միջազգային հանրությանը, որ մեզ ագրեսիայի մեջ չմեղադրեն»,-ասաց փորձագետը՝ եզրափակելով. «Մենք աշխարհից հայանպաստ դիրքորոշում չենք ուզում, այլ օբյեկտիվություն»։