Ես զզվանք ապրեցի հայկական շոու-բիզնեսի ներկայացուցիչներից. Գոհար Վեզիրյանի և Շուշան Պետրոսյանի բանավեճը

Լրագրող Գոհար Վեզիրյանը երեկ Շուշան Պետրոսյանի ֆեյսբուքյան էջում հետևյալ գրառումն էր կատարել (վերափոխված է հայատառի).

«Կներեք լատինատառի համար, բայց պետք է գրեմ։ Շատ տգեղ է, երբ ոհմակով հարձակվում եք լրագրողի վրա և սկսում եք բոլորին համահարթեցնել: Դա նույն բանն է, եթե օրինակ ասենք, որ Դուք, Նունե Եսայանը, Թաթուլը, Լիլուն, Լեյլա Սարիբեկյանը, Սպիտակցի Հայկոն, Արտաշ Ասատրյանն ու Եվա Ռիվասը նույն գործով եք զբաղված ... բոլորդ էլ երգում եք: Հետաքրքիր է, եթե տաղավարում մենակ լրագրողները լինեին ու ձեզանից որևէ մեկը, և հիստերիայի մեջ հայտնված լրագրողներով հարձակվեին ձեզ վրա՝ ի՞նչ կանեիք: ATV-ի «Կիսաբաց լուսամուտներ»-ի եթերն ահավոր էր, ու ես զզվանք ապրեցի հայկական շոու-բիզնեսի ներկայացուցիչներից...»

Մի քանի ժամ անց Շուշան Պետրոսյանը պատասխանեց լրագրողին նույն ոգով.

«Կներեք լատինատառի համար, բայց պետք է գրեմ։ Շատ տգեղ է, երբ ոհմակով հարձակվում եք արտիստի վրա ու սկսում եք բոլորին համահարթեցնել. Գոհար, զզվանք ես էլ եմ, ավաղ, հաճախ ապրում՝ առնչվելով վատ ժուռնալիստական աշխատանքի հետ: Հիմա Դուք՝ լավ ժուռնալիստդ, իսկ ես Ձեզ համարում եմ այդպիսին, պաշտպանում եք Ձեր կոլեգաներին, որոնք միշտ չէ, որ փայլում են պրոֆեսիոնալիզմով, ու ես հարգում եմ Ձեր սկզբունքը: Իմն էլ նույնն է՝ անկախ իմ վերաբերմունքից որոշ հնչած կարծիքների»։