Ջոն Հեֆերնը՝ Հիլարի Քլինթոնի տարածաշրջանային այցի վերաբերյալ (տեսանյութ)

Հունիսի 7-ին, Հայաստանում ԱՄՆ դեսպան Ջոն Հեֆերնն իր տեսաբլոգում ամփոփել է ԱՄՆ պետքարտուղար Հիլարի Քլինթոնի տարածաշրջանային այցը: Ստորեւ ներկայացնում ենք դեսպան Հեֆերնի խոսքն ամբողջությամբ:

«Բարեւ ձեզ: Պետքարտուղար Հիլարի Քլրինթոնը, Նախագահ Սարգսյանը եւ արտգործնախարար Նալբանդյանը միասին նշեցին ԱՄՆ-ի եւ Հայաստանի միջեւ դիվանագիտական հարաբերությունների հաստատման 20 ամյակը հունիսի 4-ին Պետքարտուղարի Երեւան կատարած այցի ընթացքում: Սա Պետքարտուղարի 2-րդ այցն էր Հայաստան, որը հստակ մատնանշում է այն կարեւորությունը, որ տրվում է Հայաստանին ու տարածաշրջանին Պետքարտուղարի եւ Նախագահի կողմից: Քսանամյակի թեմայից զատ՝ պետքարտուղարը բոլոր հանդիպումներում ու բոլոր միջոցառումների ժամանակ շեշտադրեց գործընկերությունն ու արժեքները: Նա հանդիպում ունեցավ Հայաստանում պարգեւների արժանացած 11 անձանց հետ, որոնց թվում էին մարդու իրավունքների պաշտպանի, խիզախ կնոջ, կառավարության բարեփոխումների առաջատարի, քաղաքացիական ակտիվության, ինչպես նաեւ մամուլի ազատության մրցանակներին արժանացած անձինք: Մեր այս հիանալի գործընկերների մասին ես առանձին տեսաբլոգ կներկայացնեմ առաջիկա շաբաթների ընթացքում: Պետքարտուղարի այցը մեկ անգամ եւս ի ցույց դրեց, որ իրական գործընկերությունը խարսխվում է ընդհանուր արժեքների վրա: Նախագահ Սարգսյանի եւ արտգործնախարարի հանդիպումներում Պետքարտուղարը քննարկեց ներքին եւ տարածաշրջանային հարցեր:

Լեռնային Ղարաբաղի հետ կապված Պետքարտուղարը դատապարտեց հրադադարի խախտման վերջին միջադեպը, որին զոհ են գնացել 3 հայ զինվորներ: Նա խոստացավ Բաքվում խստորեն նշել, որ ուժի կիրառումը չի կարող Լեռնային Ղարաբաղի հակամարտության լուծումն ապահովել: Նա նաեւ հավաստիացրեց Նախագահին եւ արտգործնախարարին, որ միացյալ նահանգները որպես Մինսկի խմբի համանախագահ շարունակում է հավատարիմ մնալ Հելսինկյան ակտի 3 սկզբունքներին, այն՝ ուժի կամ ուժի սպառնալիքի չկիրառման, տարածքային ամբողջականության ու ազգերի հավասար իրավունքների ու ինքնորոշման սկզբունքները որպես ինտեգրված ամբողջություն, որ հիմնարար նշանակություն ունի հակամարտության լուծման համար:

Հայ-թուրքական հաշտեցման հետ կապված Պետքարտուղարը վերահաստատեց իր կարծիքը, որ արձանագրությունների վավերացման հետ կապված գնդակը Թուրքիայի դաշտում է:

Ի վերջո, նա եւ Նախագահը քննարկեցին ընտրություններին, առեւտրին, ներդրումներին, կառավարմանը վերաբերող հարցեր: Պետքարտուղարը հորդորեց ավելի շատ բարեփոխումներ կատարել, կատարել ավելի մեծ թափանցիկությամբ, որպեսզի Հայաստանը լինի ավելի ժողովրդավար, ավելի բարեկեցիկ ու ավելի ապահով երկիր:

Ես Այցին անդրադարձել եմ twitter-ի իմ էջում, հրավիրում եմ ձեզ միանալ ինձ այնտեղ: Շնորհակալություն:

Ընդհանուր արժեքներն իրական գործընկերության հիմքն են»