Կայք կոմունալ խնդիրների մասին. citybugs.am-ը կգործարկվի 2 ամսից

BarCamp Yerevan 2012-ի շրջանակներում X-Tech ընկերության ներկայացուցիչ Հովհաննես Աղաջանյանը ներկայացրեց Citybugs.am կայքի առաքելությունը։

«Մենք հաճախ քաղաքապետին, տարբեր մարդկանց մեզ հուզող խնդիրների մասին տեղեկացնում ենք իրենց ֆեյսբուքյան էջերին փոստեր անելով, բայց չենք իմանում՝ հետո ինչ արձագանք է լինում: Դրա համար էլ ստեղծվել է citybugs.am կայքը, որը հնարավորություն է տալիս մարդկանց իրենց կոմունալ խնդիրների մասին անմիջապես կայքում գրել»:

Ըստ Հովհաննես Աղաջանյանի՝ Citybugs.am-ը նպատակ է հետապնդում բարելավելու և տեսանելի դարձնելու բարեփոխումները քաղաքաշինության ոլորտում, բարելավելու հետադարձ կապը հասարակության հետ, ապահովելու Երևանի Քաղաքապետարանի գործունեության թափանցիկությունն ու բարձրացնելու բնակչության իրազեկվածության աստիճանը Երևանի կոմունալ խնդիրների վերաբերյալ:

Կայքում ակտիվ մասնակցություն ունենալու համար նախևառաջ պետք է գրանցվել, այնուհետև տեղադրել խնդիրը նկարագրող լուսանկարը, թողնել կոնտակտներ: 30 օրյա ժամկետում պետք է ստուգվեն խնդրի հավաստի լինելը, այնուհետեւ վերահասցեավորեն համապատասխան ոլորտի պատասխանատուին, ապա՝ պատասխանեն խնդիրը բարձրացնողին:

Տեղեկացնենք, որ կայքը կգործարկվի 2 ամսից: