ՀԱԿ-ը` բացարձակ առաջատար. սոցհարցման ամփոփում

Եվ այսպես ԼՈՒՐԵՐ.com-ը 10 օրվա ընթացքում այսպիսի հարց էր առաջարկել իր ընթերցողներին. Ո՞ր կուսակցությանը կտայիք ձեր ձայնը, եթե խորհրդարանական ընտրությունները լինեին այսօր:  

Առաջատարը ընդդիմադիր Հայ Ազգային Կոնգրես դաշինքն է, որը քվեարկության փակման ժամանակ հավաքել է  27% : Երկրորդ տեղում ԲՀԿ-ն է` 25%-ով, ապա ՀՅԴ-ն՝ 17%-ով ու ՀՀԿ-ն` 16%-ով: 7% ձայն է հավաքել Ժառանգությունը, նույնքան էլ այլ կուսակցությունները, իսկ ՕԵԿ-ը ամենավերջին տեղում է. այդ ուժի օգտին քվեարկել է մեր ընթերցողների  1%-ը միայն: 

Տաս օր շարունակ մեր ընթերցողները քվեարկեցին իրենց նախընտրած քաղաքական ուժերի համար: Առաջին օրերին աղյուսակի բացարձակ առաջատարը ՀՅԴ-ն էր. հետո ՀՅԴ-ականները, համարելով, որ կատարել են իրենց առաքելությունը եւ սոցիալական ցանցերում քվարկություն են ապահովել, փոքր-ինչ հանդարտվեցին: Վերջին օրերին ՀՅԴ-ի համար քվեարկողների  հոծ խմբերը անգործության մատնվեցին` պարտության մատնելով Դաշնակցությանը: Ի տարբերություն ՀՅԴ-ի, ԲՀԿ ընտրազանգվածը ակտիվ եւ համառ քվեարկեց այս քաղաքական ուժի համար: ԲՀԿ-ն երկար ժամանակ առաջին հորիզոնականում էր, միայն վերջին օրերին զիջեց առաջատարի իր դիրքերը: ՀՀԿ-ի համար քվեարկեցին առաջին երկու օրերին, հետո ՀՀԿ-ի համար այլեւս քվեարկողներ չեղան: ՀՀԿ-ն, ըստ էության, վիրտուալ իրականության մեջ եւս ընտրազանգվածի լուրջ խնդիր ունի:

Ինչ վերաբերվում է ՀԱԿ-ին, ապա ՀԱԿ-ը առաջին հորիզոնականներում հայտնվեց վերջին օրերին: ՀԱԿ-ին քվեարկողները շարունակեցին համառորեն քվեարկել` չհիասթափվելով անգամ այն ժամանակ, երբ ՀԱԿ-ը հայտնվել էր գրեթե վերջին հորիզոնականներում:

ԼՈՒՐԵՐ.com-ը շարունակելու է նմանատիպ հարցումներով ներկայացնել այսօր տիրող քաղաքական հարաբերությունները, մթնոլորտն ու հնարավոր զարգացումները: Մասնակցեք մեր հարցումներին` ձեր ցանկությամբ եւ քաղաքական արժեքային համակարգի շրջանակներում ձեւավորելով Հայաստանի քաղաքական քարտեզը: