Միքելանջելոյի խորաքանդակը՝ Մեդիչի պալատում

Իտալացի գիտնականներ Ալեսանդրո Վեցոզին և Գաբրիել Մորոլին «Պալացո Մեդիչի-Ռիկկարդի» պալատի Միկելոցո բակում հայտնաբերել են Միքելանջելոյի խորաքանդակը:

Իրենց հետազոտության մանրամասները գիտնականները հրապարակել են «Michelangelo Assoluto» գրքում, որը, ինչպես հայտնում է Arte-n, հրատարակվել է հունիսի 14-ին: Հետազոտողները կարծում են, որ խորաքանդակը պատկանում է Միքելանջելոյին, քանի որ դրա վրա պատկերված են Վեներան և Կուպիդոնը:

Միքելանջելոյի ոճին բնորոշ է հատկապես Կուպիդոնի պատկերումը: Գիտնականները նշում են, որ խորաքանդակը կարող է լինել գեղանկարիչ Պոնտորմոյի «Վեներա և Կուպիդոն» գեղանկարի մարմնավորումը: Խորաքանդակի վրա, ինչպես գեղանկարում, վերջինս պատկերված է աստվածուհուն համբուրելիս:

Կուպիդոնի դիրքը և շարժումները կրկնում են Միքելանջելոյի կողմից «Madonna Taddei» և «Madonna Pitti» մարմարյա ռելիեֆների վրա քանդակված երեխայի հայտնի պատկերները։

Մարմարե բարձրաքանդակը ստեղծվել է 1504 թվականին: Միքելանջելոյի աշխատանքը 1445-1460 թվականներին ճարտարապետ Միկելոցոյի նախագծով կառուցված «Պալացո Մեդիչի-Ռիկարդի» պալատում է հայտնվել 18-րդ դարասկզբին։ Այստեղ է գտնվում Ռիկարդյան գրադարանը, որը նույնպես հիմնադրվել է 18-րդ դարասկզբին: