Շվեդիան հրաժեշտ տվեց 1/4 եզրափակիչ դուրս գալուն. Անգլիան շարունակում է պայքարը

Ավարտվեց Եվրո-2012-ի Անգլիա–Շվեդիա հանդիպումը։ Հանդիպումը բավականին գեղեցիկ ու հետաքրքիր ստացվեց։

Անգլիայի հավաքականն առաջին խաղակեսում Էնդրյու Քերոլի խփած գնդակի շնորհիվ ընդմիջման գնաց հաղթողի դերում։

Երկրորդ խաղակեսի հենց սկզբում շվեդները՝ Շվեդիայի հավաքականի պաշտպան Մելբերգի և Անգլիայի հավաքականի խաղացող Գլեն Ջոնսոնի «համատեղ ջանքերով», հավասարեցրեցին հաշիվը՝ 1-1։ Արդեն 10 րոպե անց նույն Մելբերգի շնորհիվ Շվեդիան առաջ անցավ հաշվի մեջ։

Փոխարինման դուրս եկած «Արսենալի» խաղացող Ուոլկոտը կարողացավ 64-րդ րոպեին գեղեցիկ հարվածով հավասարեցնել խաղի հաշիվը։ 78-րդ րոպեին նույն Ուոլկոտի փոխանցումից հետո գեղեցիկ գոլի հեղինակ դարձավ Ուելբեկը՝ առաջ մղելով անգլիացիներին։ Խաղի ընթացքում 2 կողմերն էլ ունեին գոլ խփելու հնարավորություններ, սակայն հաշիվն այդպես էլ չփոխվեց. Անգլիան հաղթեց 3-2 հաշվով։

Անգլիան ունի 4 միավոր և նույնքան միավոր ունեցող Ֆրանսիայի հետ գլխավորում է D խմբի աղյուսակը։ Ուկրաինան ունի 3 միավոր, իսկ Շվեդիան, չունենալով ոչ մի միավոր, կորցրեց բոլոր հնարավորությունները՝ 1/4–րդ եզրափակիչ դուրս գալու համար։