ԱԻՆ-ը` դրական օրինակ այլ երկրների համար

Հունիսի 19-ին ՀՀ արտակարգ իրավիճակների նախարարություն է այցելել Հայաստանում ՄԱԿ-ի համակարգող և ՄԱԶԾ մշտական ներկայացուցիչ Դաֆինա Գերչևան: Այցի հիմնական նպատակն էր նախանշել համագործակցության նոր ուղղություններն ու ծանոթանալ ԱԻՆ ճգնաժամային կառավարման կենտրոնի տեխնիկական նոր հնարավորություններին:

Հանդիպման սկզբում տիկին Գերչևան շնորհավորեց ԱԻ նախարար Արմեն Երիցյանին` պաշտոնում վերանշանակվելու կապակցությամբ. «Ուրախ եմ, որ մենք շարունակելու ենք արդյունավետ համագործակցությունը և վստահ, որ միասին ավելի մեծ հաջողություններ ենք ունենալու: Վերջերս մենք հաստատել ենք թունաքիմիկատների ու աղտոտված շրջակա միջավայրի մաքրման հետ կապված մի խոշոր ծրագիր, որի հիմնական գործընկերը լինելու է հենց ԱԻ նախարարությունը»:

ԱԻ նախարար Ա. Երիցյանը նկատեց, որ նախարարությունը լուրջ առաջընթաց է արձանագրել նաև ՄԱԶԾ գրասենյակի հետ արդյունավետ փոխգործակցության շնորհիվ, որը գնահատվեց նաև ՀՀ նախագահի կողմից. «Առաջիններից մեկն ԱԻ նախարարի վերանշանակումը ցույց տվեց, թե որքանով են կարևորվում այս կառույցի նշանակությունն ու առաքելությունը, որպեսզի այն շարունակի անխափան գործունեությունը: Ես ունեմ նվիրված թիմ ու հավատարիմ գործընկերներ` ի դեմս ՄԱԶԾ գրասենյակի, որոնց օգնությամբ մենք հաստատուն քայլերով գնալու ենք առաջ»:

Եվս մեկ ուրախալի նորություն. Հայաստան գալով ու որպես օրինակ վերցնելով ՀՀ ԱԻՆ դրական փորձը` Մոնտե Նեգրոն և Ղըրղըզստանը մշակել են իրենց երկրներում ԱԻ կառույցների զարգացման ծրագրեր, ինչը տիկին Գերչևայի խոսքերով շատ գնահատելի է:

Խոսելով անելիքների մասին` Ա. Երիցյանը հայտնեց, որ նախատեսվում է արագ նորոգել ու վերազինել Գառնիի դիտարանը, որպեսզի այն դառնա տարածաշրջանային գիտական կենտրոն, և ՀՀ հեռավոր գյուղերում ստեղծել կամավորական հրշեջ-փրկարարական ջոկատներ` ավելի օպերատիվ արձագանք ապահովելու համար:

Նախարարության նոր նախաձեռնություններից է սահմանափակ հնարավորություններով մարդկանց ԱԻՆ համակարգում աշխատանքի տեղավորելը: Ուսումնասիրություններ են արվում հաշմանդամների համար բոլոր անհրաժեշտ պայմաններն ապահովելու ուղղությամբ, որպեսզի նրանք կարողանան մյուս աշխատակիցների հետ ինտեգրված աշխատել:

Այս նախաձեռնությունն արժանացավ Դ. Գերչևայի հավանությանը, և նա հույս հայտնեց, որ ԱԻՆ այս քայլը ևս դրական օրինակ կծառայի մյուս գերատեսչությունների համար` մանավանդ հաշվի առնելով Հայաստանում հաշմանդամների գործազրկության բարձր մակարդակը:

Հանդիպման ընթացքում որոշվեց ստեղծել ԱԻՆ-ՄԱԶԾ աշխատանքային խումբ, որը կքննարկի և ղեկավարների ուշադրությանը կներկայացնի համատեղ ֆինանսավորմամբ համագործակցության նոր ոլորտներն ու ուղիները:

Վերջում տիկին Գերչևան եղավ նաև ԱԻՆ ճգնաժամային կառավարման կենտրոնում և ծանոթացավ կենտրոնի նոր տեխնիկական հնարավորություններին։ «Չափազանց տպավորված եմ նրանով, որ մեր փոքրիկ օժանդակությամբ դուք այսպիսի մեծ նվաճումներ ունեք: Շնորհակալություն' լավ աշխատանքի համար»,- հանդիպման ավարտին ասաց Հայաստանում ՄԱԿ-ի մշտական համակարգողը: