Ինչո՞ւ է խուսափում Ոստիկանությունը

Այսօր հրապարակվել է տեսանյութ, որում ՀՀ ԱԺ պատգամավոր Ռուբեն Հայրապետյանի թիկնազորի ներկայացուցիչների խմբում կրկին երևում է «Հարսնաքար» ռեստորանում ՊՆ բժիշկներին դաժան ծեծի ենթարկած Գարիկ Մարգարյանը:

Lurer.com-ի հետ զրույցում Ոստիկանության հասարակայնության հետ կապերի եւ լրատվության վարչության աշխատակից Արմեն Մալխասյանը, պատասխանելով հարցին, թե այդ տեսանյութերը որքանով իրենց ազդեցությունը կունենան գործի քննության վրա, նշեց, որ այդ հարցով իրենց չպետք է դիմել։

«Ոչինչ չեմ կարող ասել, բայց  ուզում եմ հասկանալ՝ տեսանյութը կապ ունի՞ այս դեպքի հետ:

Մենք ասել ենք, որ կալանավորված են վեց անձինք, ասել ենք անուն-ազգանունները, ասել ենք, որ կա հարուցված քրեական գործ, նախաքննությունը շարունակվում է: Մնացած հարցերի վերաբերյալ այլ իրավասու անձանց պետք է դիմեք: Հանցագործության վերաբերյալ մենք մեր մեկնաբանությունը տվել ենք», - նշեց Մալխասյանը:

Տեղեկացնենք նաև, որ այս հարցով դիմել ենք Ոստիկանության քննչական գլխավոր վարչության հատկապես կարևոր գործերի քննության բաժնի պետ Արսեն Այվազյանի հետ, ով նշեց, որ քրեական գործի շարժի վերաբերյալ նմանատիպ հարցերով դիմել Ոստիկանության հասարակայնության հետ կապերի եւ լրատվության վարչության :

Հիշեցնենք, որ օրեր առաջ Lurer.com-ը տեսանյութի ուսումնասիրությամբ բացահայտել էր, որ «Հարսնաքարի» գործով կասկածյալ Գարիկ Մարգարյանն իրականում Ռուբեն Հայրապետյանի թիկնազորի անդամ է։ Իսկ այսօր Epress.am լրատվական կայքը հրապարակել է տեսանյութ, որում ՀՀ ԱԺ պատգամավոր Ռուբեն Հայրապետյանի թիկնազորի ներկայացուցիչների խմբում կրկին երևում է «Հարսնաքար» ռեստորանում ՊՆ բժիշկներին դաժան ծեծի ենթարկած Գարիկ Մարգարյանը: