Նոր Նորքի բնակիչները կողմ են թանգարանի կառուցմանը

Այսօր Երևանի քաղաքապետարանի տեղեկատվության և հասարակայնության հետ կապիերի վարչությունից տեղեկացրել են, որ այս առավոտյան Նոր Նորք վարչական շրջանի բնակիչները նամակ են հանձնել Երևանի քաղաքապետ Տարոն Մարգարյանի անունով.

«Մենք՝ Նոր Նորքի բնակիչներս, տեղեկանելով, որ քաղաքապետարանի շենքի դիմաց որոշ մարդկանց կողմից, ովքեր իրենց հորջորջել են որպես բնության պաշտպաններ և զբաղված են շահարկումներով, նախապատրաստվում են բողոքի ակցիա ընդդեմ Նանսենի անվան թանգարանի շինարարության, որոշեցինք հանդես գալ նախաձեռնությամբ և ստորագրահավաք անցկացնել՝ ի պաշտպանություն թանգարանի կառուցման։

Մեկ օրվա ընթացքում մենք՝ թաղամասի բանկիչներս, հավաքել ենք հազարից ավելի ստորագրություններ, որոնք դեռ շարունակվում են, և մենք պարբերաբար դա կներկայցնենք Ձեզ, որով փաստում ենք, որ համայքի բնակչությունը ոչ միայն ողջունում է նախաձեռնության հեղինակներին, այլև պատրաստ է հասարակական աջակցությամբ օժանդակել թանգարանի կառուցման աշխատանքների իրականացմանը»։

Նշենք նաև, որ նամակին կցված են եղել ստորագրող քաղաքացիների անուն-ազգանուները և նրանց հեռախոսահամարները։