Ծխելուց կարելի է ազատվել նաև բջջայինի օգնությամբ. հետազոտություն

Բջջային հեռախոսները կարող են դառնալ հաջորդ զենքը ծխելու դեմ պայքարում: Գիտնականներն ուսումնասիրել են, թե ինչպես կարելի է նոր տեխնոլոգիաները, տեքստային SMS-ների օրինակով օգտագործել ծխողներին այդ վատ սովորության դեմ պայքարել օգնելու համար:

Թասմանիայի համալսարանի բժիշկ Սթյուարթ Ֆերգյուսոնի խոսքերով՝ առաջին մեկ շաբաթվա ընթացքում ծխողին կարելի է SMS հաղորդագրության միջոցով առաջարկել ավելի քիչ հաճախել զվարճանքի վայրեր, ուր ծխելու գայթակղությունը մեծ է, քանի որ այդպես ավելի հեշտ կլինի ազատվել ծխելու վնասակար սովորությունից: Իսկ եթե նրանց մոտ մոլեգնում է ծխելու անզուսպ ցանկությունը, պետք առաջարկել վերցնել հեռախոսը և երկարաշունչ հաղորդագրություններ գրել։ Հայտնի է, որ նյարդային վիճակում հայտնված մարդը հակված է շատակերության կամ հաճախակի ծխելու։ Այսպիսով, կարելի է հանդարտեցնել նյարդային պոռթկումները՝ սեղմելով հեռախոսի կոճակներին։

Ի դեպ, «SMS-թերապիան» արդեն իսկ փորձարկվել է մի քանի պետություններում: Բայց, չնայած դրան, Ֆերգյուսոնը խոստովանում է. «Մենք գիտենք, որ դա աշխատում է, սակայն չգիտենք, թե ինչպես»: