Մհեր Սեդրակյանի քրոջ որդին կալանավորվել է

ԱԺ ՀՀԿ-ական պատգամավոր Մհեր Սեդրակյանի (Թոխմախի Մհեր) քրոջ որդու՝ Արման Բադալյանի նկատմամբ որպես խափանման միջոց ընտրվել է կալանքը: Այս մասին Lurer.com-ի հետ զրույցում ասաց Ոստիկանության հասարակայնության հետ կապերի եւ լրատվության վարչության աշխատակից Արմեն Մալխասյանը: 

Արմեն Մալխասյանը նշեց, որ Արման Բադալյանին մեղադրանք է առաջադրվել ՀՀ Քրեական օրենսգրքի 258 հոդվածի 3-րդ (խուլիգանություն) և 235 հոդվածի առաջին մասերով (ապօրինի զենք պահելը): Նախաքննությունը շարունակվում է:

Հիշեցնենք, որ Ոստիկանության կողմից հուլիսի 4-ին, Երևանի երկաթգծի կայարանի սրճարաններից մեկից բերման է ենթարկվել Արման Բադալյանը՝ ԱԺ պատգամավոր ՀՀԿ-ական Մհեր Սեդրակյանի (Թոխմախի Մհեր) քրոջ որդին: Նրա մոտ հայտնաբերվել է «Բերետա» տիպի ատրճանակ:

Այս առթիվ որոշ լրատվամիջոցներ նշում են, թե Բադալյանը մասնակցություն է ունեցել 2008 թ. մարտի 4-ին Կայարանի հրապարակում տեղի ունեցած ծեծկռտուքին, որը շարունակվել էր հացի փռի մոտ։ Արդյունքում հրազենային վնասվածքից սպանվել էր Արսեն Գալստյանը: Բադալյանի անունը կապվում է նաև հանցաշխարհի ներկայացուցիչ՝ «բիճ» մականունով հայտնի Սուրեն Զորոյանի սպանության հետ:

Մեր ունեցած տեղեկությունների համաձայն՝ Բադալյանը կասկածվում է նաև այլ նմանատիպ հանցագործություններում։