Ամեն ինչ ուզում են հանգեցնել 5-10 տարվա պատժամիջոցի. Լարիսա Ալավերդյան

«Վահե Ավետյան» հասարակական շարժման նախաձեռնող խումբը Վահե Ավետյանի մահվան քառասունքի օրը հայտարարում է համահայկական մոմավառության օր և կոչ է անում թե՛ Հայաստանի և թե՛ Սփյուռքի մեր եղբայրներին ու քույրերին հարգել հայորդու, հայոց բանակի սպա, զինվորական բժիշկ Վահե Ավետյանի հիշատակը։

Հայաստանի մարդու իրավունքների նախկին պաշտպան, «Վահե Ավետյան» հասարակական շարժման նախաձեռնող խմբի անդամ Լարիսա Ալավերդյանի կարծիքով, արդեն իսկ անզեն աչքով երևում է, որ այս օրերի ընթացքում պրն. Այվազյանի կողմից հնչեցված կային բազմաթիվ հակասություններ, և կարծես թե, անհամընկնություններ։ Լարիսա Ալավերդյանի կարծիքով, մի շարք հանգամանքներ, շատ կտրուկ եզրակացություններ, ինչպես օրինակ, ընդամենը մեկ անգամ քաղաքացի Ռուբեն Հայրապետյանին որպես վկա հրավիրելը, վկայում են նախօրոք կողմնորոշում տրված գործընթացի մասին, որ սա հերթական փորձ է գործը վերածելու Պողոս Պողոսյանի սպանության նմանակին։

«Եթե հիշում եք, այն դեպքում ևս ամեն ինչ բնութագրվեց որպես մահ ոչ թե ծեծի հետևանքով, այլ մեղմացվող պարագաներ առաջ քաշվեցին։ Եվ մենք գտնում ենք, որ այստեղ էլ, պրն. Այվազյանի կողմից հնչեցված բոլոր խոսքերի, նախադասությունների և ստորակետների մեջ անգամ հստակ երևում է, որ ամեն ինչ ուզում են հանգեցնել 5-10 տարվա պատժամիջոցի»,- նշեց Լարիսա Ալավերդյանը։

Ըստ նախկին իրավունքների պաշտպանի, տեղի ունեցածը միտված էր ժողովրդի արժանապատվությունը նսեմացնելուն, բայց այստեղ արդեն հասել է պահը հասկանալու, որ սա քաղաքական վերլուծությունների, քաղաքական հետևությունների, քաղաքական գործողությունների անհրաժեշտություն ունեցող մի դեպք է։

«Եվ մենք գնալու ենք այդ ճանապարհով, վերհանելու ճշմարտությունն ու իրականությունը, մենք անելու ենք սեփական ռեսուրսներով, սակայն կարծում ենք, որ լրագրողները, և ո՛չ միայն հետազոտող լրագրողները, այլև շատերը, կմիանան մեզ»,- նշեց Լ. Ալավերդյանը։