ՀՀ քաղաքացիները որքանով են ծանոթ ՀՀ Սահմանադրությանը

Հուլիսի 12-ին «Սիվիլիթաս» հիմնադրամը հրապարակել է Սահմանադրության օրվա առիթով անցկացրած հարցման արդյունքները։ Հեռախոսային հարցումը անցկացվել է հուլիսի 3-ին և 4-ին՝ շուրջ 1100 անձանց մեջ։ Տվյալները համակշռվել են՝ ըստ Հայաստանի բնակչության մարզային և սեռատարիքային բաշխումների։ Հետազոտության արդյունքների սխալը 3.4% է։ Հարցման արդյունքում գրանցվել է 847 հաջողված պատասխան։

Հարցման արդյունքները ցույց են տալիս, որ հարցվածների 39%-ը բոլորովին ծանոթ չէ ՀՀ Սահմանադրության բովանդակությանը, իսկ 30%-ը ծանոթ է միայն նրա մի մասին։ Սահմանադրությանն ամբողջությամբ ծանոթ է հարցվածների ընդամենը 3%-ը։

Հարցվածների գերակշիռ մեծամասնության կարծիքով՝ Հայաստանի Հանրապետությունում չեն պաշտպանվում և հարգվում մարդու հիմնարար իրավունքներն ու արժանապատվությունը։ Հարցին, թե որքանով է Սահմանադրության այն ձևակերպումը, որ մարդու արժանապատվությունը հարգվում և պաշտպանվում է պետության կողմից, բնութագրում այսօրվա Հայաստանը, հարցման մասնակիցների կեսից ավելին պատասխանել է՝ չի բնութագրում։ Միայն 9%-ն է գտնում, որ պետությունը պաշտպանում և հարգում է մարդու արժանապատվությունը։

Սահմանադրությամբ ամրագրված, մարդու և քաղաքացու հիմնարար իրավունք հանդիսացող խոսքի ազատության առումով ևս հարցվածների կեսից ավելին՝ 51%-ը, գտնում է, որ Հայաստանում խոսքի ազատության իրավունքը, այդ թվում՝ տեղեկատվություն փնտրելու, ստանալու և տարածելու ազատությունը, պաշտպանված չեն։

Ժողովրդավարության հիմնասյուն «Բոլորը հավասար են օրենքի առջև» սահմանադրական նորմը, հարցվածների 73%-ի կարծիքով, այսօր չի բնութագրում Հայաստանը։ Միայն հարցվածների 10%-ն է գտնում, որ Հայաստանում բոլորը հավասար են օրենքի առջև։

Ուշագրավ է, որ հարցվածների գերակշիռ մեծամասնությունը՝ 83%-ը, համոզված է, որ հանցագործության մեղադրյալը պարտավոր է ապացուցել իր անմեղությունը, մինչդեռ օրենքով հակառակն է ամրագրված։