Պետք է փորձենք հավաքել 44 ստորագրություն. Լևոն Զուրաբյան

ԱՐԽԻՎ 12 Հուլիս, 2012 19:56

Հայ ազգային կոնգրեսի համակարգող, ԱԺ ՀԱԿ խմբակցության ղեկավար Լևոն Զուրաբյանն այսօր լրագրողների հետ հանդիպման ժամանակ ներկայացրել է ԱԺ ՀԱԿ խմբակցության հայտարարությունը, որը ներկայացնում ենք սոտորև.

«Հաշվի առնելով, որ 2012 թվականի հունիսի 17-ին Երևանի «Հարսնաքար» ռեստորանային համալիրում տեղի ունեցած ծանրագույն հանցագործությունները հասարակական մեծ հնչեղություն են ստացել` առաջացնելով հանրային դժգոհության մեծ ալիք և ինքնաբուխ զանգվածային ակցիաներ, նկատի ունենալով, որ ԱԺ-ի կողմից արագ և համարժեք արձագանքը կնպաստի հասարակության մեջ լարվածության թուլացմանը, անպատժելիության մթնոլորտի վերացմանը, օրենքի առաջ բոլոր մարդկանց հավասարության և պատասխանտվության անխուսափելիության սկզբունքների ապահովմանը, նկատի ունենալով, որ դեպքերի կապակցությամբ շոշափվում է ԱԺ պատգամավորի մասնակցության և պատասխանատվության հարցը, հաշվի առնելով, որ դեպքերի ոչ համարժեք և թերի քրեաիրավական գնահատականը կարող է բացասաբար ազդել հայոց բանակի բարոյահոգեբանական վիճակի վրա, հաշվի առնելով ԲՀԿ, ՀՅԴ և Ժառանգություն խմբակցությունների ներկայացուցիչների հետ տեղի ունեցած խորհրդակցությունները, որոշում ենք այդ խմբակցությունների պատգամավորների հետ համատեղ հուլիսի 17-ին՝ ժամը 12-ին, հրավիրել ԱԺ-ի արտահերթ նստաշրջան «2012 թ. հունիսի 17-ին Երևանի «Հարսնաքար» ռեստորանային համալիրում պաշտպանության նախարարության մի խումբ սպաների դաժան ծեծի ենթարկելու, նրանցից մեկին մահ պատճառելու հանգամանքների ուսումնասիրության նպատակով ԱԺ ժամանակավոր հանձնաժողով ձևավորելու ԱԺ որոշում ընդունելու մասին» օրակարգով», - ասված է հայտարարության մեջ:

Այն ընթերցելուց հետո Զուրաբյանը նշեց նաև, որ այսօր ժամը 17։55-ին քարտուղարությունից ստանալու են ձևաթուղթ, և այդ պահից սկսած՝ օրենքով նախատեսված 24 ժամվա ընթացքում պետք է հասցնեն հավաքել ստորագրությունները. «Այդ ընթացքում մենք պետք է փորձենք հավաքել 44 ստորագրություն: Այդ ստորագրությունների հիմնական մասը մենք կհավաքենք, բնականաբար, աշխատելով խմբակցությունների հետ: Բոլոր այն պատգամավորները, որոնք պատրաստ են աջակցել այս նախաձեռնությանը, խնդրում ենք վաղը ժամը 13։00-15։00-ը այցելեն ԱԺ-ում Նիկոլ Փաշինյանի սենյակ:

Այս որոշման մեջ չկա որևէ կետ, որն իր նախադեպը չունի Մարտի 1-ի ժամանակավոր հանձնաժողովի ստեղծման որոշման հետ համեմատած, ուստի ոչ ոք չի կարող ասել, որ մենք ինչ-որ ապօրինի բան ենք պահանջում», -նշեց Զուրաբյանը՝ հավելելով, որ այն, ինչ իրենք են պահանջում, ունի իր նախադեպը. «Եթե այդ մարդիկ ԱԺ-ում ժամանակին ստեղծել են Մարտի 1-ի հանձնաժողով, ուրեմն նույն հիմնավորվածությամբ կարող են ստեղծել այս ժամանակավոր հանձնաժողովը»: