ԱԺ արտահերթ նստաշրջան հրավիրելուն դեմ արտահայտվողները նպաստում են Ռուբեն Հայրապետյանի անձեռնմխելիության պահպանմանը

Մեր զրուցակիցն է «Պահանջում ենք պատժել Հարսնաքարի միջադեպի բոլոր մեղավորներին » նախաձեռնության անդամ Արթուր Մինասյանը: 

- Այսօր նախաձեռնությունը հանդես եկավ հայտարարությամբ, որում Ազգային ժողովի պատգամավորներին կոչ էր արվում հանդես գալ ԱԺ արտահերթ նստաշրջան հրավիրելու նախաձեռնությամբ: Դրանից որոշ ժամանակ անց հայտնի դարձավ, որ արտակոալիցիոն խորհրդարանական խմբակցությունները այսօր սկսում են արտահերթ նստաշրջան հրավիրելուն ուղղված ստորագրահավաք պատգամավորների շրջանում: Ինչո՞վ է պայմանավորված արտահերթ նստաշրջանի հրավիրման անհրաժեշտությունը: 

- Բանն այն է, որ Հարսնաքարի սեփականատեր Ռուբեն Հայրապետյանը միջադեպից հետո քաղաքացիական ցասման ալիքի ճնշման ներքո պարտադրված եղավ հայտարարել իր պատգամավորական մանդատը վայր դնելու մասին, սակայն ըստ ԱԺ կանոնակարգ օրենքի՝ մանդատազրկման գործընթացը ավարտին հասցնելու համար անհրաժեշտ է, որ ԱԺ նիստում հնչեցվի Հայրապետյանի դիմումը: Քանի որ ԱԺ հերթական նստաշրջանը տեղի է ունենալու սեպտեմբերին միայն, Հայրապետյանին մանդատից զրկելու գործընթացն իր ավարտին հասցնելու համար անհրաժեշտ է ԱԺ արտահերթ նստաշրջան: Բացի այդ, ԱԺ արտահերթ նստաշրջանում կարող է ձեւավորվել միջադեպի մանրամասներն ուսումնասիրող ժամանակավոր հանձնաժողով, որն անձամբ ես անհրաժեշտ եմ համարում՝ միջադեպի առնչությամբ հարուցված քրեական գործի քննության թափանցիկությունն ու հրապարակայնությունն ապահովելու տեսանկյունից: 

- Քիչ առաջ նախաձեռնությունը Facebook սոցիալական ցանցում հայտարարեց վաղը ժ 13:00-ին ԱԺ-ի դիմաց ակցիա կազմակերպելու մասին: Ինչո՞վ է պայմանավորված ակցիա կազմակերպելու անհրաժեշտությունը եւ որոնք են դրա նպատակները:

- Քանի որ արտակոալիցիոն խորհրդարանական խմբակցությունները հանդես են եկել ԱԺ արտահերթ նստաշրջան հրավիրելու նախաձեռնությամբ, վաղը ԱԺ-ում պատգամավորները պետք է ստորագրեն համապատասխան նախագիծը: Օրենսդրության համաձայն՝ անհրաժեշտ է ԱԺ պատգամավորների 1/3-ի ստորագրությունը՝ նստաշրջանը հրավիրելու համար: Մենք պատրաստվում ենք գնալ Ազգային ժողովի մոտ՝ վերահսկելու պատգամավորների կողմից նախագծի ստորագրման գործընթացը: Ցանկացած պատգամավոր, քաղաքական ուժ, քաղաքացիական նախաձեռնություն կամ անհատ քաղաքացի, որ իր մասնակցությամբ չի նպաստի ԱԺ արտահերթ նստաշրջանի հրավիրման գործընթացին, կարող է դիտվել իբրեւ Ռուբեն Հայրապետյանին պատգամավորական մանդատից եւ անձեռնմխելիությունից զրկելու հակառակորդ՝ դրանից բխող հետեւանքներով: 

- Ի՞նչ կասեք նախաձեռնության մյուս պահանջների մասով: 

- Դուք գիտեք, որ մեր նախաձեռնությունը հանդես է եկել հայտարարությամբ, որտեղ հստակ ներկայացված են մեր բոլոր պահանջները: ԱԺ արտահերթ նստաշրջանի հրավիրումը դրանցից մեկն է միայն, եւ մենք հետեւողական ենք լինելու նաեւ մյուս պահանջների կյանքի կոչման գործում: