ԲՀԿ-ական պատգամավորների զգալի մասն այստեղ չէ. Նաիրա Զոհրաբյան

ԲՀԿ-ական պատգամավորների զգալի մասն այստեղ չէ, Lurer.com-ի հետ զրույցում այսօր ասաց Բարգավաճ Հայաստան խմբակցության ղեկավար Նաիրա Զոհրաբյանը: Վերջինիս կարծիքով, արտահերթ նստաշրջան անցկացնելու նախաձեռնության տակ ԲՀԿ-ական պատգամավորների ստորագրության թիվը մեծ չի լինի:

«Ես քանիցս ասել եմ, որ նույնիսկ ԵՄ նախագահ Ռոմպեյի հետ հանդիպմանը, որը դեռ հուլիսի չորսին էր, 10-12 պատգամավոր էր ներկա Հայաստանում: Հիմա կարծում եմ, որ այն մարդիկ, ովքեր Հայաստանում են և նախաձեռնությանը տեղյակ են, եթե որոշեն ստորագրել, օրվա ընթացքում կմոտենան ԱԺ-ին և կստորագրեն», - նշեց Զոհրաբյանը:

Հարցին, թե այն պարագայում, երբ ԲՀԿ-ական շատ պատգամավորներ այստեղ չեն, ինչո՞ւ է ԲՀԿ-ն միացել այդ նախաձեռնությանը, Նաիրա Զոհրաբյանն ասաց. «Քանի որ նման նախաձեռնություն կա: Ես ինքս անձնապես չեմ կարծում, որ այս պահին արտահերթ նիստ անելու հրատապ անհրաժեշտություն կար, բայց քանի որ մեր գործընկերների կողմից կա նախաձեռնություն, մեր որոշ պատգամավորներ այդ թվում՝ նաև ես, կմիանանք»:

Հիշեցնենք, որ ԲՀԿ, «Ժառանգություն», ՀԱԿ և ՀՅԴ խմբակցությունները հանդես են եկել արտահերթ նիստ հրավիրելու առաջարկով։ Վերջիններս առաջարկում են հուլիսի 17-ին ժամը 12-ին ԱԺ արտահերթ նիստ հրավիրել «Հարսնաքարի» դեպքերի հետ կապված ժամանակավոր հանձնաժողով ստեղծելու նպատակով։