Վիտալի Բալասանյանի կոչը ընտրողներին

ԼՂՀ նախագահի թեկնածու Վիտալի Բալասանյանը Արցախի Հանրային Հեռուստատեսության եթերում դիմել է ընտրողներին. 

«Սիրելի հայրենակիցներ,

Նախընտրական արշավը մոտենում է ավարտին և ես կցանկանայի ամփոփել իմ մոտեցումները տարբեր հարցերի շուրջ, որոնց մասին մենք մանրամասն խոսել ենք 150-ից ավելի հանդիպումների ժամանակ: Կցանկանայի դիմել մեր բնակչության տարբեր խմբերի: Սկսենք արցախյան պատերազմի մասնակիցներից, Պաշտպանության բանակի զինծառայողներից:

Սիրելի զինակիցներ,

Մոտ քսան տարի առաջ մեզ պարտադրված պատերազմում մենք դուրս եկանք թշնամու դեմ' պաշտպանելու մեր արժանապատվությունը և ստեղծելու մեր երազած երկիրը:

Մենք պայքարի ելանք հանուն մեր արժանապատվության, հանուն նրա, որ յուրաքանչյուր արցախցի ապրի արժանապատվորեն, առանց վախի, առանց ճնշումների, բարեկեցիկ կյանքով, ինչը մեզ արգելում էին օտարները: Իշխանությունների վարած քաղաքականության հետևանքով մենք այսօր չունենք այն, ինչի համար պայքարել էինք և ինչի համար իրենց կյանքն էին զոհել մեր մարտական ընկերները:

Այսօր իրական հնարավորություն է ստեղծվել՝ կյանքը փոխելու համար և, ինչպես ցույց են տալիս իմ շփումները հազարավոր մարդկանց հետ, այժմ առավել քան երբևէ մոտ ենք հաղթանակին, որը թույլ կտա իրականացնել հանրությանը ներկայացրած մեր ծրագիրը: Ծրագիր, որի իրագործման դրական արդյունքները կզգան բոլոր արցախցիները, այլ ոչ թե մի խումբ պաշտոնյաներ:

Ժողովրդի հաղթանակին կարող են խանգարել միայն վարչական ռեսուրսի ապօրինի կիրառումը և զանգվածային ընտրակեղծիքները իշխանության թեկնածուի օգտին: Այս ամենը կանխելու և ժողովրդի հաղթանակն ապահովելու համար ակնկալում եմ ձեր անմիջական մասնակցությունը ընտրությունների վերահսկմանը՝ թե ընտրական տեղամասերում, թե դրանից դուրս:

Պատերազմի սիրելի վետերաններ,

Մեր երազանքի իրականացման նախապայմաններից մեկն այն է, որ իշխանությունը լինի լեգիտիմ: Այսինքն ընտրվի օրինական ճանապարհով, առանց կեղծիքի: Ձեր կենսագրությամբ դուք բարոյական իրավունք եք վաստակել բռնել կեղծարարի ձեռքը' դրանով աջակցելով օրենքի հաստատմանը մեր երկրում: Տեղերում աջակցելով մեր վստահված անձանց՝ դուք ավելի կմոտեցնեք ժողովրդի հաղթանակը:

Պաշտպանության բանակի սիրելի զինծառայողներ,

Իմ ծրագրի հիմնական կետերից են պաշտպանական բարեփոխումները: Փոխվելու է մարտական հերթապահության հնացած ձևը, կրճատվելու է հերթապահության ժամկետը' նպատակ ունենալով բարձրացնել երկրի պաշտպանունակությունը, զորքերի մարտական պատրաստվածությունը, առաջին գծում հերթապահող զինծառայողների անվտանգությունը: Իմ ուշադրության կենտրոնում են լինելու նաեւ ձեր սոցիալ-կենցաղային պայմանները:

Այսօր բանակում ծառայող մեր ընկերները, թեև ստանում են համեմատաբար բարձր աշխատավարձ, այնուամենայնիվ նրանցից շատերը մեծ պարտքեր ունեն բանկերին' վերցրած սպառողական վարկերի պատճառով:

Իմ նախագահ ընտրվելու դեպքում զինվորականներին տրվող սպառողական վարկերի տոկոսները փոխհատուցվելու են պետության կողմից և հնարավոր է լինելու անտոկոս սպառողական վարկեր վերցնել' սեփական կենցաղային պայմանների բարելավման համար: Զինվորականները մեր հասարակության այն խավն են, ովքեր ամենաշատն են իրենց կյանքը վտանգում եւ մենք պարտավոր ենք նրանց՝ մեր խաղաղ կյանքն ապահովելու համար: Պետության այս ծախսերն արդարացված կլինեն և հասարակությունն ըմբռնումով կմոտենա ռիսկային այս խմբին տրվելիք արտոնություններին:

Սիրելի զինվորականներ,

Ինձ տեղեկություններ են հասնում, որ Պաշտպանության բանակի հրամանատարությունը սպայական տարբեր խմբերի հետ բազմաթիվ խորհրդակցություններ է անցկացնում, որոնց ժամանակ կատարում է քարոզչություն գործող նախագահի օգտին և պարտադրում նրանց նույնն անել նաև իրենց ենթակաների շրջանում: Ուզում եմ հիշեցնել պաշտպանության բանակի հրամանատարական կազմին, որ պաշտպանության բանակի առաքելությունը ոչ թե հեռացող նախագահի քարոզչության իրականացումն է, այլ՝ երկրի սահմանների պաշտպանության ապահովումը: Զինծառայողների կողմից քարոզչությունն արգելված է օրենքով և հանդիսանում է օրենքի կոպիտ խախտում: Հայ սպային վայել չէ ապօրինի գործողություններ կատարելը, հատկապես, երբ դրանք ուղղված են սեփական ժողովրդի կամքի դեմ:

Հարգելի զինծառայողներ,

Հանդիսանալով Արցախում ամենակայացած կառույցի ծառայողներ, մեր պետականության անվտանգության երաշխավորներ, համոզված եմ, որ սկզբունքային վարքով դուք օրինակ կհանդիսանաք մեր շատ բնակիչների համար:

Ցանկանում եմ դիմել պետական և քաղաքացիական ծառայողներին:

Սիրելի հայրենակիցներ,

Վստահեցնում եմ ձեզ, որ հաղթանակի դեպքում կադրային ջարդ չի լինելու: Ձեզանից շատերը բարեխիղճ ծառայողներ և բարձրակարգ մասնագետներ են, և ձեզանից շատերի ծառայողական առաջխաղացումը շատ հաճախ կանգնեցվում է որոշ իշխանավորների համար յուրային չլինելու պատճառով: Իմ կադրային քաղաքականության հիմքում լինելու է ձեր ներուժի ամբողջական բացահայտման համար նպաստավոր պայմանների ստեղծումը: Միեւնույն ժամանակ կառավարման տարբեր ոլորտներում ներգրավելու ենք անհիմն պատճառներով համակարգից դուրս մնացած որակյալ մասնագետներին: Վստահեցնում եմ, որ քաղաքական հայացքների համար ոչ մեկը չի հետապնդվելու նոր իշխանությունների կողմից: Իրենց քաղաքական պաշտոններին հրաժեշտ են տալու միայն այն մարդիկ, ովքեր չեն կարողացել լուծել իրենց առջև դրված խնդիրները, գործել են անարդյունավետ, եղել՝ կոռումպացված' վստահված ոլորտները հասցնելով ծանր վիճակի:

Մեկ անգամ ևս դիմում եմ գործարարներին,

Հարգելիներ,

Գործարար մարդը, ով կարողանում է ստեղծել աշխատատեղ, մուծել հարկեր, արտադրանք տալ կամ ծառայություն մատուցել, երկրի հարստությունն է: Հզոր են այն երկրները, որոնք կարողանում են գնահատել գործարար ջիղն ու նախաձեռնողականությունը: Բարեկեցիկ են այն երկրները, որտեղ գերակշռում է միջին խավը:

Իմ ընտրվելու դեպքում հարկային ծառայությունը վերածվելու է գործարարին օգնող ծառայության, ստուգումների հաճախականությունը հասցվելու է նվազագույնի, հարկային դաշտը պարզեցվելու է եւ թեթևացվելու է հարկային բեռը:

Արցախի և Հայաստանի Հանրապետության միջև մաքսակետերն անիմաստ են և պետք է շուտափույթ կարգով հանվեն, քանզի երկու պետությունները տնտեսական մեկ տարածք են կազմում: Մաքսակետերի անիմաստ առկայությունը թե ծախսատար է պետության համար, և թե խոչընդոտում է գործարարությանն ու ազատ ապրանքաշրջանառությանը, նպաստում՝ գնաճին:

Գաղտնիք չէ, որ Արցախում գրեթե ամեն ինչ թանկ է՝ թե ապրանքները, թե մատուցվող ծառայությունները: Սա արդյունք է տարբեր մենաշնորհների և գերիշխող դիրքի չարաշահումների: Հենց այս պատճառով է, որ Հայաստանի համեմատ բավականին թանկ է գազալցակայանների ծառայությունը, դիզելային վառելիքը, բենզինը, հեռախոսակապը: Էներգակիրների թանկության պատճառով բարձանում են նաև տարբեր ծառայությունների և ապրանքների, հատկապես սննդամթերքի գները: Արցախում ամենաշատն արտադրվող գյուղմթերքների' խաղողի և ցորենի մթերման գործը ամբողջովին վերահսկվում է մեկ-երկու հոգու կողմից, ովքեր էլ արտադրողներին թելադրում են ցածր գներ' արժեզրկելով հողօգտագործողների չարչարանքը:

Արցախը հարուստ է հիդրոռեսուրսներով, սակայն այստեղ արտադրվող էլեկտրաէներգիայի արժեքը գնալով թանկանում է: Ցածր ինքնարժեքով էլեկտրաէներգիա արտադրող երկիրն իրավունք չունի այն թանկ գներով վաճառել իր սեփական բնակիչներին:

Իմ ընտրվելու դեպքում վերջ է դրվելու մենաշնորհներին և կորպորատիվ գործարքներին, ինչի շնորհիվ էականորեն իջնելու են դիզվառելիքի, բենզինի, ինչպես նաեւ գազի գները ավտոլցակայաններում: Էլեկտրաէներգիայի եւ նշված էներգակիրների գների նվազումը առավել մատչելի կդարձնի մատուցվող ծառայություններն ու ապրանքները: Նոր իշխանությունները կանեն հնարավորը՝ վերացնելու բջջային հեռախոսակապի բաժանորդավճարը եւ վերանայելու հեռախոսակապի գները:

Սիրելի հայրենակիցներ,

Իմ նախընտրական շտաբի կողմից անցկացված սոցհարցումները, ինչպես նաև ժողովրդի տրամադրությունը և արտահայտած աջակցությունը վկայում են, որ մեր հաղթանակին հասնելը ամբողջովին իրական է: Ստեղծում է մի նոր իրավիճակ, որտեղ արդիական է դառնում իշխանության սահուն, առանց ցնցումների փոխանցման հարցը: Սա իշխանություններից և իշխանամետ ուժերից պահանջում է մեծ պատասխանատվություն և իրական հայրենասիրության դրսևորում:

Իշխանությունների կողմից ընտրակեղծիքները կհամարվեն դավաճանություն և ժողովրդի կամքի դեմ բռնացում, որն անհետևանք չի մնա: Զանգվածային ընտրախախտումները համարվելու են իշխանությունների կողմից ներքին կայունության դեմ ուղղված քայլ: Այդ դեպքում հնարավոր զարգացումների ամբողջ պատասխանատվությունն ընկնելու է գործող նախագահի և նրա թիմակիցների վրա:

Այս իրավիճակում առանցքային նշանակություն ունի բոլոր մակարդակի ընտրական հանձնաժողովների անդամների դերը և նրանց քաղաքացիական դիրքորոշումը:

Հանձնաժողովների հարգելի անդամներ,

Ձեզ պատմական հնարավորություն է ընձեռված՝ անցկացնել ազատ, արդար, առանց կեղծիքների ընտրություն, ինչը լուրջ նախապայման է Արցախի ժողովրդավարական զարգացման ու հզորացման համար:

Ժողովրդավարական են համարվում այն երկրները, որտեղ քաղաքացիները ընտրությունների միջոցով կարողանում են իշխանություն փոխել: Օրինական ընտրությունների անցկացումն Արցախում անմիջապես կբարձրացնի երկրի միջազգային վարկանիշը, հիմք կդառնա հասարակության զարգացման համար:

Սիրելի արցախցիներ,

Ժողովրդի հաղթանակը ժողովուրդն է կերտում: Համոզված եմ, որ միասնական ուժերով մեզ կհաջողվի հասնել փոփոխությունների և ապահովել Արցախի անվտանգ և բնականոն զարգացումը: