Եվրոպական միությունը Սիրիայի դեմ պատժամիջոցների նոր փաթեթ է նախապատրաստում

Եվրամիությունը պատրաստում է Սիրիայի դեմ պատժամիջոցների հերթական,17–րդ փաթեթը, РИА Новости-ին հաղորդել է իր աղբյուրը ԵՄ մամուլի ծառայությունում։

«Արդեն տարվում են աշխատանքներ պատժամիջոցների նոր փաթեթի նախապատրաստման համար»,-ասել է գործակալության զրուցակիցը։

Ըստ աղբյուրի, սպասվում է, որ նոր պատժամիջոցները կհաստատվեն Բրյուսելում հուլիսի 23–ին կայանալիք ԵՄ 27 երկրների արտաքին գործերի նախարարների հանդիպման ժամանակ։ Նշվում է, որ խոսքը սիրիացի ֆիզիկական և իրավաբանական անձանց ցանկի ընդլայնման մասին է, որոնց մուտքը ԵՄ երկրներ արգելված է, իսկ ակտիվները Եվրոպայում սառեցվում են, ինչպես նաև Սիրիայի նկատմամբ տնտեսական պատժամիջոցների մասին։

Սիրիայի նկատմամբ պատժամիջոցների նախորդ՝ 16-րդ փաթեթը հաստատվել է ԵՄ արտաքին գործերի նախարարների կողմից հունիսի 25-ին Լյուքսեմբուրգում։ Ներկայումս ԵՄ «սև ցուցակում» ընդգրկված է 49 ընկերություն և 129 Սիրիայի քաղաքացի։

Հիշեցնենք, որ Սիրիայում ավելի քան մեկ տարի չեն դադարում կառավարության դեմ ուղղված բողոքի ակցիաները: Ըստ ՄԱԿ-ի տվյալների, ընդհանուր զոհերի թիվը գերազանցել է 12.000-ը: Սիրիական իշխանությունները հայտարարում են, որ զինված ընդդիմության հետ բախումների արդյունքում զոհվել է ավելի քան 2,5 հազար զինծառայող ու ոստիկանության աշխատակից, որոնց դեմ գործում են լավ զինված զինյալները։ Ապրիլ ամսից երկրում Քոֆի Անանի ծրագրի համաձայն զինադադար է հայտարարվել, որի պահպանման համար պետք է հետևեն ՄԱԿ-ի դիտորդները։ Այնուամենայնիվ, հակամարտության կողմերը պարբերաբար հայտնում են նոր զինված միջադեպերի և զոհերի մասին։