Ամենաթողության պատասխանատուն հանրապետության նախագահի պաշտոն զբաղեցնող անձն է. Արթուր Մինասյան

«Մենք համոզված ենք, որ փորձ է արվում կոծկել քրեական գործը և ամբողջությամբ չվերարտադրել իրական պատկերը»,- այսօր լրագրողների հետ հանդպմանը հայտարարեց «Պահանջում ենք պատժել «Հարսնաքար»–ում տեղի ունեցած միջադեպի բոլոր մեղավորներին» նախաձեռնության ներկայացուցիչ Արթուր Մինասյանը ։

«Շատ զարմանալի է, որ որոշակի դաշտերից, հատկապես քաղաքական իշխանության ներկայացուցիչների և իրավապահների կողմից ասվում է, որ իրենք հայտարարություններով երաշխավորում են, որ քրեական գործը կքննվի բաց, և շատերն անընդհատ մեզ հարց են տալիս՝ նրանք երաշխավորում են, ինչո՞ւմն է խնդիրը։ Խնդիրը հետևյալում է. մենք ունենք տասնյակ նախադեպեր, և մենք բոլորս՝ ՀՀ քաղաքացիներս, հստակ գիտենք ինչ երկրում ենք ապրում և ոչ մեկի համար գաղտնիք չէ, թե ինչ է նշանակում ՀՀ–ում իրավապահ մարմիններ, իրավապահ համակարգ, դատական համակարգ, արդարադատություն՝ ընդ–որում, թե ինչ վիճակում է այդ ամենը գտնվում։ Մենք այդպիսի կոծկման բազմաթիվ դեպքեր ունենք, հավաստիացումներ ունենք, բայց այդ հավաստաիցումները բավարար հիմք չեն եղել, որ գործերը չկոծկվեն։ Այսինքն՝ մենք ունեք Հոկտեմբերի 27–ի, Մարտի1–ի, բանակում տեղի ունեցող սպանությունների և դրանց քննության նախադեպերը, մենք անընդհատ ենք լսում դրա մասին։ Հավաստիացումներ գործը քննելու մասին կան, բայց իրականությունը լրիվ այլ է և պետք չէ հավաստիացումները հիմք ընդունել»,– ասաց Մինասյանը։

Բանախոսը նշեց նաև, որ ոստիկանության նախորդ ասուլիսը բացարձակ անհամոզիչ էր։

«Ոչ մի ապացույց չբերվեց, որ Ռուբեն Հայրապետյանը այնտեղ չի եղել, կամ որևէ կերպ առնչություն չի ունեցել այդ գործին։ Հակառակը, ավելի կասկածելի բաներ ասվեցին՝ տեսախցիկները փչացել են, վկաներ չկան... Պարզվում է, որ Ռուբեն Հայրապետյանի ողջ «մարշրուտի» երկայնքով այդ օրը ՀՀ բոլոր տեսախցիկները փչացել են։ Ձայնագրությունները չկան, դեպքից երեք օր առաջ տեսախցիկները փչացել են. ո՛չ «Հարսնաքարի» ներսում կա, ո՛չ դրսում կա ձայնագրություն, ո՛չ Ֆուտբոլի Ֆեդերացիայում կա։ Ոչ մի տեղ տեսախցիկ գոյություն չուներ Հայաստանում և ոչ մեկ ոչինչ չի ֆիքսել»,– նշեց նա և հավելեց, որ որ չպետք է խորանալ միայն իրավական ձևակերպումների մեջ, քանի որ ՀՀ–ում իրենք իրավիճակը, հոգեբանությունը գիտեն, գիտեն նաև Հայրապետյան անձի հատկանիշները, և սխալ է խոսել այն մասին, որ իրավական հիմնավորումներ չկան. «Իսկ իրավական հիմնավորումներ բերվում ե՞ն, որ Հայրապետյանը կապ չունի այս ամենի հետ։ Բացարձակապես չեն բերվում»։

Մինասյանը նշեց նաև, որ լկտիություն է, երբ ոստիկանության աշխատակիցը հայտարարոմ է, որ դեռ պետք է պարզել, թե ինչից է մահացել Վահե Ավետյանը։

«Մարդկանց փորձում են հիմարի տեղ դնել և սա ուղղակի լկտիության գագաթնակետն է, երբ ոստիկանության աշխատակիցը հայտարարոմ է, որ դեռ պետք է պարզել, թե ինչից է մահացել Վահե Ավետյանը։ Ուղղակի կարելի է ապշել, թե ինչպես են կարողանում այդ մարդիկ նման բան ասել։ Մահվան պատճառը ծեծն է։ Հստակ է, որ նրա մահվան պատճառը եղել է ուղեղի կենսական կարևոր ֆունկցիաների խանգարումը՝ այտուցի պատճառով, այտուցը ձևավորվել է բազմակի հարվածների հետևանքով։ Ասեմ ավելին՝ կա տեղեկատվություն, որ Վահե Ավետյանի բժշկական փաստաթղթերն ուղարկվել են Ֆրանսիա, Ավստրիա և այլն, բժիշկների արձագանքը ուղղակի ապշեցուցիչ է եղել, նրանք ասել են, որ իրենց մոտ նման նախադեպ չի գրանցվել, երբ ուղեղի դիսլոկացիան՝ մի կիսագնդից մյուսը, մինչև 4սմ է։ Եվ այսքանից հետո ասել, որ Վահե Ավետյանի մահը պետք է պարզել ինչից է... Գիտե՞ք էլ ինչից կարող է լինել. ենթադրենք՝ նրանք կարող են «բոչկա գլորել» բուժող բժիշկների վրա, թե սխալ բուժում է իրականցվել։ Դա աբսուրդ է, ի սկզբանե արձանագրվել է ուղեղի դիսլոկացիա այտուցով։ Իսկ այդ մարդու ստացած վնասվածքները կյանքի հետ անհամատեղելի են։ Սա էլ է ապացուցում, որ ոստիկանությունը հակված չէ գործի իրականությունը բացահայտելուն»,– ասաց նա։

Անդրադառնալով նաև այն հանգամանքին, որ բժիշկները հայտարարել են, թե իրենց ծեծել են տասը–տասնհինգ հոգի, բայց կալանավորված են վեցը և մյուսների մասին ոչինչ չգիտենք, Մինասյանն ասաց. «Ոստիկությունը չի կարողանում հայտնաբերել մյուսներին։ Այս դեպքում կամ ոստիակությունը կոմպետենտ չէ, կամ մասնագիտական իմպոտենցիա է ցուցաբերում, կամ գիտի և չի ձերբակալում»։

Բանախոսը, անդրադառնալով նաև Ռուբեն Հայրապետյանի թիկնազորի ներկայացուցիչներին, ասաց. «Ճիշտ է՝ դե յուրե թիկնապահ չեն, բայց դե ֆակտո անձնական թիկնազորի ներկայացուցիչ են» և հավելեց, որ ՀՀ–ում ոչ մի թիկնազորի ներկայացուցիչ կամ օբյեկտի աշխատող իր տիրոջ՝ «պապայի» հրահանգից դուրս իրեն ոչինչ թույլ չի տալիս։

Անդրադառնալով խնդրի լուծմանը՝ նախաձեռնության ներկայացուցիչն ասաց, որ իրենք կարծում են՝ խնդիրը պետք է լուծել իրավական դաշտում և քաղաքական իշխանությունները ընդամենը պետք է չմիջամտեն գործի ընթացքին։ Ըստ նրա՝ այն որ իշխանությունները միջամտում են և չեն ցանկանում Հայրապետյանին պատասխանատվության ենթարկել, դա ակնհայտ է։

«Հայաստանում կա ամենաթողության մթնոլորտ, որի թիվ մեկ պատասխանատուն հանրապետության նախագահի պաշտոն զբաղեցնող անձն է, որը իրեն պահում է՝ որպես ասիական բռնապետ, որը ներկայանում է ազգի «պապայի» դիրքերից և հասարակությանը հուզող հարցերը փորձում է այդ դիրքերից լուծել»,– ասաց Մինասյանը։