Բալասանյանը զգուշացնում է Վարդան Ղուկասյանին

Գյումրիում մթնոլորտը բավականին լարված է. վերջին օրերին, երբ հայտնի դարձավ, որ «Բարգավաճ Հայաստան» կուսակցության (ԲՀԿ) քաղաքապետի թեկնածուն Սամվել Բալասանյանն է, իսկ գործող քաղաքապետի առաջադրվել-չառաջադրվելու հարցը հարցականի տակ է, լարվածությունն ավելի ակնհայտ դարձավ:

Մամուլում օրեր առաջ լուրեր շրջանառվեցին, որ Գյումրիի քաղաքապետ Վարդան Ղուկասյանի որդին` Սպարտակ Ղուկասյանը, Բալասանյանի տնից մոտ 30 մ հեռավորության վրա մեքենայով կանգնել եւ բարձրաձայն հայհոյանքներ եւ սպառնալիքներ է հնչեցրել, ասել է` «չեք վայելելու»:

Սամվել Բալասանյանը «Ազատություն» ռադիոկայանին փոխանցեց, որ ինքը այդ պահին տանը չի եղել, իրեն այդ մասին պատմել են ականատեսները:

«Ոնց որ թե փորձ է արվում լարվածություն ստեղծել, բայց ես ուղղակի զգուշացնում եմ` շատ հեռու մնա նման լարվածություններ ստեղծելուց, ուղղակի ես զգուշացնում եմ: Խոսքը այն մարդկանց մասին է, որոնք գիտեմ, որ ուզում են լարվածություն ստեղծել: Դե, մեր ականջին շատ բան է կպնում. ես զգուշացնում եմ ուղղակի, որ հեռու մնան, քաղաքակիրթ մրցակցության գնալու ակնկալիքով եմ ես գնում իմ թեկնածությունը առաջադրելու», - ասաց Բալասանյանը:

Հարցին, թե նախքան իր թեկնածությունը առաջադրելու մասին ԲՀԿ-ի հայտարարությունը ինքը ի վերջո հանդիպե՞լ է նախագահ Սերժ Սարգսյանին, թե՞' ոչ, Բալասանյանը պատասխանեց. - «Մեր հանդիպումը աշխատանքային է եղել, ուղղակի քանի որ այս խոսակցությունը կար, իրար հետ համընկավ, եւ բոլոր լրատվամիջոցները մտածեցին, թե «դաբրոյի» խնդիր կա: Չէ՞ որ էդ պահին նույնիսկ ԲՀԿ-ն դեռ չէր հայտարարել իմ թեկնածության մասին»:

Բալասանյանն ասաց` ՀՀԿ-ի որոշելիքն է կսատարի իրեն, թե` ոչ:

«Ճիշտն ասած, իրենց որոշելիքն է, թե Հանրապետականը, «Ժառանգությունը», ՀԱԿ-ը կամ մյուսը ինչ կանեն, ի վերջը բոլորը այստեղից ձայներ են ստացել: Կարող է պաշտպանեն, ճիշտ ասած, չգիտեմ, դա իրենց պետք է հարցնեք, բայց եթե այդպիսի բան լինի, նոր [քաղաքական] մշակույթ կձեւավորվի, որը չի եղել մինչեւ հիմա», - ասաց նա:

Azatutyun.am