Մնացած ասածներս նշանակություն չունեն. Ահարոն Ադիբեկյան

ԼՂՀ նախագահ ընտրություններին ընդառաջ, Ահարոն Ադիբեկյանի «Սոցիոմետր» սոցիոլոգիական կենտրոնը կատարել էր սոցհարցում, համաձայն որի՝ Արցախի նախագահական ընտրությունների երկրորդ փուլ չի լինի, իսկ առաջին փուլում մոտ 75% ձայներով կհաղթի ԼՂՀ գործող նախագահ Բակո Սահակյանը, Վիտալի Բալասանյանը կհավաքի ձայների մոտ 20 %-ը, իսկ Արկադի Սողոմոնյանը՝ 5%-ը։ Մինչդեռ իրականում Բակո Սահակյանը ստացավ ձայների 66.7%-ը, Վիտալի Բալասանյանը՝ 32.5 %-ը, իսկ Արկադի Սողոմոնյանը՝ 0.8%-ը։

Սխալի այսքան մեծ տոկոսի հետ կապված՝ Lurer.com-ը փորձեց մեկնաբանություն ստանալ Ահարոն Ադիբեկյանից։

«Ես վերջին ասուլիսում ասել եմ, որ կլինի միափուլ ընտրություն, ընտրությանը կմասնակցի բնակչության 75%-ը, կհաղթի Բակո Սահակյանը, ով չի հավաքի 85%-ը, իսկ մնացած ասածներս նշանակություն չունեն։ Հարցումը կատարվել էր մեկ ամիս առաջ, և քանի որ Բակո Սահակյանի հաղթանակը կասկածի ենթակա չէր, ապա երկրորդ ճշտող հետազոտություն մենք չկատարեցինք։ Դրա համար կարող էին լինել տոկոսային որոշ սխալներ։ Բայց նախագահականին կարևորն այն է, թե ով է ընտրվում և որ փուլով, իսկ տոկոսները կարևոր չեն»,- ասել է նա։

Lurer.com-ի հետ զրույցում Ահարոն Ադիբեկյանը պարզաբանեց, թե ինքը միայն ասել է, որ որոշում կայացնող ձայների տոկոսը 32 է, որից 3% բաժին է ընկում Վիտալի Բալասանյանին, 1.5%-ը՝ Սողոմոնյանին ու Խաչատրյանին, իսկ մնացյալ 27%-ը՝ Բակո Հահակյանին, իսկ հարցվածների 56%-ը դեռ որոշում չի կայացրել։ Իսկ, ահա, հուլիսի 17-ին կայացած ասուլիսի ժամանակ նա հարցվածների չկողմնորոշված տոկոս սահմանել էր 65%-ը։

Հարց է առաջանում, եթե նախագահական ընտրություններին տոկոսային տվյալները կարևոր չեն, ապա ինչու է Ահարոն Ադիբեկյանը դրանք հրապարակում, և ինչպես կարելի է որոշակի եզրակացություն անել և սոցիոլոգիական հարցման արդյունք հարապարակել, երբ հարցվածների միայն 32%-ն են իրենց նախապատվությունները տվել այս կամ այն թեկնածուին։