Հուլիսի 1-ից սկսած ՀՀ-ում գրանցվել է օձի խայթոցի 31 դեպք

ՀՀ Առողջապահության նախարարության տվյալներով, 2012 թվականի հուլիսի 1-ից առայսօր Հայաստանի Հանրապետությունում գրանցվել է օձի խայթոցի 31 դեպք, որից մեկը մահվան ելքով:

Նշենք, որ հուլիսի 22-ին Արմավիրի մարզի Դալարիկ գյուղի բնակիչ 1958թ. ծնված Բաբկեն Խաչատրյանին օձը խայթել է դաշտում: Տուժածը մահացել է Արմավիրի բժշկական կենտրոն տեղափոխելու ճանապարհին:

Օձի խայթոցի հետևանքով Երևանի բուժհաստատություններ են դիմել 8-ը, մարզային բուժհաստատություններ' 22-ը. Կոտայքի մարզ՝ 8, Արմավիրի մարզ' 6, Տավուշի մարզ՝ 3, Արագածոտնի մարզ՝ 2, Վայոց ձորի մարզ՝ 1, Արարատի մարզ՝ 2:

18 դեպքում ներարկվել է հակաթույն, 12 դեպքում չի ներարկվել, քանի որ դրա անհրաժեշտությունը չի եղել:

Հիվանդներին ժամանակին կանխարգելիչ և բժշկական օգնություն ցուցաբերելու, ինչպես նաև կանխարգելիչ դեղանյութերի որոշակի քանակություն տեղերում պահեստավորելու նպատակով առողջապահության նախարարությունը հանրապետության բոլոր բժշկական կազմակերպությունների հետ համատեղ ձեռնարկել է միջոցառումներ տեղերում շիճուկների և պատվաստանյութերի առկայությունը ապահովելու համար: Օձի խայթոցի յուրաքանչյուր դեպքի մասին, սահմանված կարգի համաձայն, հրատապ տեղեկատվություն է տրամադրվում առողջապահության նախարարության «թեժ գծի» հերթապահին, և վերցվում է հսկողության տակ:

Այս պահի դրությամբ, հանրապետության բժշկական հաստատություններն ապահովված են օձի հակաթույնով, բուժանձնակազմն ունի համապատասխան պատրաստվածություն և ներուժ բարձր մակարդակով բուժօգնություն ցուցաբերելու համար: