Աշտարակի քաղաքապետը հրաժարական է տվել

Այսօր առավոտյան քաղաքապետի պաշտոնից հրաժարական է տվել Աշտարակի քաղաքապետ Գագիկ Թամազյանը:

Նա շնորհակալություն է հայտնել քաղաքապետարանի աշխատակիցներին համատեղ աշխատանքի համար եւ խնդրել շարունակել աշխատել նույն ոգով' մինչեւ նոր քաղաքապետի ընտրությունը: Առաջիկա ընտրություններում իր թեկնածությունը չառաջադրելը նա մեկնաբանել է հոգնածությամբ:

Գագիկ Թամազյանը այն բացառիկ քաղաքապետերից էր, որ երկու անգամ ընտրվել է առանց խախտումների եւ առանց ընտրակաշառքի: Հարկ է նշել, որ ամեն անգամ Աշտարակի ՏԻՄ ընտրությունների ժամանակ ՀՀԿ թեկնածուն չէր կարողանում շահել աշտարակցիների վստահությունը: Իսկ հիմա Գագիկ Թամազյանի կողմից իր թեկնածությունը չառաջադրելը կանաչ լույս է ՀՀԿ-ի թեկնածուի համար:

Գագիկ Թամազյանը անկուսակցական է: Նրա ղեկավարման տարիներին Աշտարակում մի շարք կենցաղային եւ քաղաքաշինական խնդիրներ լուծում ստացան. քաղաքը մաքրվեց աղբից, ասֆալտապատվեցին տարիներ շարունակ անանցանելի փողոցները, լուծվեց քաղաքի լուսավորության հարցը, իսկ քաղաքապետարանի աշխատակազմի կոռուպցիոն ռիսկերը հասցվեցին նվազագույնի: Մոտ օրերս կապիտալ վերանորոգումից հետո կվերաբացվի Աշտարակի երաժշտական դպրոցը:

Աշտարակում ՏԻՄ ընտրությունները տեղի կունենան սեպտեմբերին:

Yerkir.am