Սփյուռքի նախարարը գիշեր-ցերեկ պիտի Սիրիայում լիներ. Հարություն Մեսրոբյան

Այսօրվա մամուլի ասուլիսին «Սարդարապատ» շարժման նախաձեռնող խմբի անդամ Ժիրայր Սեֆիլյանը, խոսելով սիրիահայության ներկա իրավիճակի մասին, նշեց.

«Հայության գործոնը միջին արևելքում բավականին մեծ է, բայց այն միշտ օգտագործվել է օտարի կողմից, հիմա եկել է հայ քաղաքական մտքի սթափվելու և ինքն իր իրավունքներին տեր կանգնելու ժամանակը։ Այսօր Սիրիայի հարցը գլխավոր խնդիր է, քանի որ մեր ժողովուրդը անտեր վիճակում է։»

Ասուլիսի մյուս բանախոս կառավարման փորձագետ Հարություն Մեսրոբյանը անդրադառնալով նույն թեմային նշեց.

«Եթե ես լավ եմ հիշում մենք ունենք Սփյուռքի նախարարություն, եթե ես լավ եմ հասկանում սիրիահայությունը սփյուռք է, նրանք փոխարենը «Արի տուն» տաշիտուշային ծրագրեր անեն, այլ պետք սփյուռքի նախարարը գիշեր-ցերեկ այնտեղ լիներ, ինչի՞ համար են այդ նախարարությունները, ի՞նչ պետք է անեն և ի՞նչ են անում։ Կան գերատեսչություններ, որոնց ճակատին փորագրված է դոշ տալ և զբաղվել այդ հարցով։ Սակայն մենք խնդիրների լուծում չենք ստանում»։