«Կեպլեր» դիտակը հայտնաբերել է Արեգակնային համակարգի նմանակին

Աստղագետները պարզել են, որ Կեպլեր-30 համակարգում հայտնաբերված երեք արտամոլորակները (Արեգակնային համակարգից դուրս մոլորակները - Ծ.Թ.) և աստղը պտտվում են միևնույն հարթությունում՝ ճիշտ այնպես, ինչպես Արեգակնային համակարգում է։ Աշխատանքը տպագրված է Nature պարբերականում, որի համառոտ բովանդակությունը ներկայացնում է ScenceNow-ն։

Կեպլեր-30a աստղն իր չափերով հիշեցնում է Արեգակը։ «Կեպլեր» ուղեծրային դիտակի օգնությամբ աստղագետներին հաջողվել է հայտնաբերել դրա շուրջ պտտվող 3 մոլորակ։ Դրանցից մեկը 4 անգամ է գերազանցում Երկրագնդի տրամագիծը, մյուս երկուսը՝ ավելի քան 10 անգամ։ Դրանց պտտման պարբերությունը կազմում է համապատասխանաբար 29, 60 և 143 օր։

Աստղագետները ցույց են տվել, որ հայտնաբերված արտամոլորակները պտտվում են միևնույն հարթության մեջ և նրանց պտտման առանցքը գրեթե համընկնում է աստղի պտտման առանցքի հետ։ Հայտնագործությունը հնարավոր է եղել կատարել աստղի մակերևույթի մեծ բծերին հետևելու արդյունքում։ Պտտվելով աստղի հետ միասին՝ դրանք նվազեցնում են լուսատուի պայծառությունը յուրաքանչյուր 16 օրը մեկ։ Գիտնականները պարզել են, որ երեք մոլորակների դիրքը հաճախ է համընկնում բծերի հետ, և քանի որ վերջիններիս չափսերը զգալիորեն փոքր են աստղի չափերից, նման համընկումը նշանակում է, որ համընկնում են դրանց պտտման առանցքները, ուստիև՝ ուղեծրերային հարթությունները։

Մոլորակների պտտման հարթությունների համընկումը դեռևս հատուկ էր միայն Արեգակնային համակարգին։ Այս փաստը նախամոլորակային գազափոշային ամպից մոլորակների կազմավորման վարկածի հիմնական կռվանն է։ Ավելին, դա խոսում է նաև այն մասին, որ Կեպլեր-30-ի համակարգն արտաքին գրավիտացիոն լուրջ ազդեցության չի ենթարկվել։ Գալակտիկայում նման համակարգերի հայտնաբերումը կարող է վկայել հօգուտ մոլորակային համակարգերի արդի տեսության ճշմարտացիության։

«Կեպլեր» դիտակի կողմից արտամոլորակների փնտրտուքը կատարվում է աստղի և դիտակի միջև մոլորակների անցումների պարբերականությունների վերլուծությամբ։