Զինվորական երդման արարողություն Ստեփանակերտում (լուսանկարներ)

Lurer.com-ի թղթակիցը հունիսի 28-ին մասնակցել է Ստեփանակերտի Եղբայրական գերեզմանոցի հուշահամալիրի մոտ տեղի ունեցած հանդիսավոր զինվորական երդման արարողությանը, որին ներկա էին ոչ միայն «Հայկազով» հրետանային զորամասի զինվորներն ու սպայական անձնակազմը, այլ զինվորների հարազատներն ու ծնողները: 

Ազգային բանակում ծառայելու զորակոչված զինվորները զինակից ընկերների առջև, հրամանատարի ներկայությամբ, զենքը ձեռքին, մարտական դրոշի ներքո հանդիսավոր երդում տվեցին՝ հավաստելով հավատարմությունն առ հայրենիք ու պատրաստակամությունը կյանքի գնով պաշտպանելու այն:

Ստեփանակերտի «Հայկազով» հրետանային զորամասի փոխգնդապետ Բաբայանն իր ելույթի մեջ նշեց, որ զինվորական երդումը հայրենասիրական արարողակարգ է՝ համարվելով զինվորի կյանքի ու ծառայության անխախտելի օրենքը, իսկ երդման դրժումը դիտվում է որպես հանցագործություն ժողովրդի ու հայրենիքի նկատմամբ:

«Այս պահին հասկանալի է այն հուզմունքը, որ տիրում է զինվորների մոտ, գիտենք, թե ինչպիսի հուզմունով են ծնողները առաջին անգամ հետևում զինվորական համազգեստ հագած իրենց որդիներին և ինչպիսի հպարտություն են նրանք լցված, որ հայրենիքին տվել են պաշտպաններ»,- ասել է նա՝ հիշեցնելով, որ զորամասը բազմակի անգամ ճանաչվել է ամենալավը, հույս հայտնելով, որ երդում տված շուրջ 100 զինվորները, ովքեր զինվորական ուխտի տակ դրեցին իրենց ստորագրությունները, կկոփվեն որպես զինովորներ և բարձր կպահեն զորամասի անունն ու կփոխանցեն նրա լավ ավանդույթները ապագա զորակոչիկներին:

«Այս հողի վրա շատ արյուն է թափվել, կփորձեմ արժանի լինել թափած արյան գնին: Շատ հուզվում էի երդումը արտասանելու ժամանակ, քանի որ զգում էի պատասխանատվության մեծ չափաբաժին՝ միևնույն ժամանակ ոգևորվելով այստեղ գտնվող հարզատներիս աջակցությամբ»,- ասել է զինվոր Ալբերտ Թադևոսյանը:

Իսկ զինակոչիկ Սարգիս Ստեփանյանի մայրը հուզմունքից չէր կարողանում զսպել արցունքները:

«Գրեթե մեկ ամիս է, ինչ չէի տեսել որդուս, իսկ հիմա նա արդեն երդված զինվոր է: Երբ առաջին անգամ տեսա նրան զինվորական համազգեստով, շատ հուզվեցի, փորձում էի զսպել արցունքներս, բայց չկարողացա:

Միայն կցանկանամ մեր երկրին խաղաղություն, թող մեր որդիները խաղաղ պայմաններում ծառայեն ու երբեք պատերազմի առհավիրքը չտեսնեն»,- եզրափակել է զինվորի մայր տիկին Սուսաննան:

Զինվորական երդման արարողությունից հետո զինվորների հարազատները հնարավորություն ունեցան մի քանի ժամ վայելել իրենց զավակների ներկայությունը, որից հետո զինվորները կշարունակեն ապրել զինվորական առօրյայով՝ միշտ հիշելով հանդիասավոր այս օրը: 

Լիլիթ Լալայան