Սերժ Սարգսյանը և Գագիկ Ծառուկյանը այցելել են հայ օլիմպիականներին (տեսանյութ)

Սերժ Սարգսյանը և ՀԱՕԿ նախագահ Գագիկ Ծառուկյանը Միացյալ Թագավորության մայրաքաղաքում հուլիսի 30-ի երեկոյան հանդիպում են ունեցել Լոնդոնում ամառային օլիմպիական խաղերին մասնակցող Հայաստանի մարզիկների հետ:

Նախագահը հաջողություն է մաղթել հայ մարզիկներին՝ վստահություն հայտնելով, որ նրանք պատվով կկատարեն իրենց առջև դրված խնդիրը: Սերժ Սարգսյանը նշել է, որ մարզիկներն առաջին հերթին իրենք են իրենց առջև այդ խնդիրը դրել՝ լավ հասկանալով, որ օլիմպիադայում հաջողության հասնելը որքան էլ դժվար, բայց հնարավոր է: Ամենակարևորը, նախագահի խոսքով, այն է, որ մեր մարզիկները կարողանան լիարժեք իրացնել իրենց հնարավորությունները՝ անկաշկանդ և ամբողջովին կենտրոնացած: Հանրապետության նախագահն ընդգծել է, որ Հայաստանի մարզիկների հաջողությունները յուրատեսակ սխրանք են, որը նրանք պետք է ձգտեն կատարել՝ մեր ժողովրդին պարգևելով ուրախության և հպարտության պահեր, այդպիսով նաև Հայաստանն ու հայ ժողովրդին ավելի ճանաչելի դարձնելով աշխարհում: Նախագահ Սերժ Սարգսյանը նշել է, որ մինչև լոնդոնյան օլիմպիադան Հայաստանի ազգային օլիմպիական կոմիտեն արել է ամեն հնարավորը, որպեսզի մեր մարզիկները պատրաստ լինեն այսօրվա մրցելույթներին:

Հանդիպմանը Գագիկ Ծառուկյանն ասել է. «Հայաստանի ազգային օլիմպիական կոմիտեն ջանք ու եռանդ չի խնայել, որպեսզի մեր մարզիկները հավուր պատշաճի նախապատրաստվեն քառամյակի մարզական ամենահեղինակավոր և կարևոր ստուգատեսին: Մնում է միայն, որ մարզական բախտը երես չթեքի մեր մարզիկներից»:

Նշենք նաև, որ ՀԱՕԿ նախագահը Լոնդոնի օլիմպիական խաղերում չեմպիոն հռչակված հայաստանցի մարզիկներին 1 միլիոն դոլարի չափով պարգևավճար է խոստացել: