ԱՄՀ-ն առաջարկում է վերանայել կենսաթոշակի տարիքը

«ՓԱՍՏԻՆՖՈ»-ի մատուցմամբ՝ Արժույթի միջազգային հիմնադրամը Ռուսաստանին առաջարկում է բարձրացնել և հավասարեցնել կանանց ու տղամարդկանց կենսաթոշակային տարիքը՝ մինչև 2030թ. սահմանելով 63 տարի, իսկ մինչև 2050թ. 65:

Այս մասին ասուլիսում հայտնել է ԱՄՀ-ի ռուսաստանյան ներկայացուցչության ղեկավար Օդդ Պեր Բրեկը: Այս առաջարկության իրացումը, ըստ նրա, թույլ կտա մինչև 2050թ. պահպանել բյուջետային համակարգի կենսաթոշակային ծախսերի ներկայիս մակարդակը՝ ՀՆԱ-ի 8%-ի չափով:

Ռուսաստանում ներկայումս կանայք թոշակի են անցնում 55, իսկ տղամարդիկ՝ 60 տարեկանում:

Բրեկը նշել է, որ ՌԴ-ում կենսաթոշակային ծախսերի մակարդակը, ըստ էության, համապատասխանում է զարգացած երկրների ցուցանիշին: Նա հավելել է, որ, հաշվի առնելով երկրում կենսաթոշակի անցնելու տարիքը և ժողովրդագրական խնդիրները, այդ ծախսերը 2050թ.-ին, սակայն, կկրկնապատկվեն՝ կազմելով ՀՆԱ-ի 18 %-ը:

Կենսաթոշակային պարտավորությունները սահմանափակելու համար, ըստ ԱՄՀ պաշտոնյայի, անհրաժեշտ է կամ ավելացնել կենսաթոշակային համակարգի եկամուտները, կամ կրճատել վերջինի ծախսերը: Նա հիշեցրել է, որ Ռուսաստանի կառավարությունը ավելի վաղ փորձել էր եկամուտների ավելացման խնդիրը լուծել' պարտադիր ապահովագրական վճարների չափը 26 %-ից բարձրացնելով մինչև 34%, սակայն հետագայում այդ լուծումը վերանայվեց: