Թալինով սկսվեցին հակասությունները

Երեկ Թալինում տեղի ունեցած արտահերթ ընտրություններն այսօր հասցրին ունենալ իրենց հակասական մեկնաբանությունները։ Մասնավորապես ԱԺ ԲՀԿ խմբակցության քարտուղար Նաիրա Զոհրաբյանը Lurer.com-ի հետ զրույցում ասաց.«Մի քանի հազար բնակչություն ունեցող Թալինում տիրում էր աննախադեպ ճնշման մթնոլորտ. քանի որ մարզպետի համար դրված էր հետագա պաշտոնավարման հարցը, ուստի նա ջանք չխնայեց Հանրապետական թեկնածուի հաղթանակն ապահովելու համար»։

Նաիրա Զոհրաբյանի բողոքի վերաբերյալ ԱԺ ՀՀԿ խմբակցության ղեկավար Գալուստ Սահակյանը կոչ է անում բողոքը ներկայացնել գրավոր ձևով։ «Առավոտյան տվյալներով ոչ մի գրավոր բողոք չի եղել. եթե Նաիրա Զոհրաբյանը նման բողոք ունի, պետք է այն ներկայացնի ինչպես օրենքն է պահանջում, որպեսզի կարողանանք ՏԻՄ ընտրությունների վիճակը բարելավել»-Lurer.com-ի հետ զրույցում նշեց Գալուստ Սահակյանը։

Հիշեցնենք, որ երեկ Թալինի քաղաքապետի պաշտոնի համար պայքարում էին ՀՀԿ-ական Սարգիս Արամյանը, ԲՀԿ-ական Վազգեն Խաչատրյանը և անկուսակցականներ Գագիկ Կարապետյանը, Էդվարդ Գրիգորյանը և Վորոշ Խաչատրյանը:

Նելլի Ավետիսյան