Դամասկոսում տիրում է համատարած վախի և սարսափի մթնոլորտ

Lurer.com-ը խոսել է Դամասկոսի հայկական համայնքի ներկայացուցիչների հետ, ովքեր իրավիճակը գնահատում են ծանր։

Նրանց փոխանցմամբ` քրիստոնեական թաղամասում, ուր ապրում է մոտ 5000 դամասկոսահայ, ընթանում են կատաղի մարտեր։ Մարդիկ չեն կարողանում դուրս գալ տներից և ապրում են համատարած վախի ու սարսափի մթնոլորտում։ Խանութներում չկան առաջին անհրաժեշտության ապրանքներ, մարդիկ անգործության են մատնված։ Իսկ այն հարցին, թե ինչպիսի վիճակ է տիրում Հալեպում, վերջիներս պատասխանում են, որ այնտեղ իրավիճակը ավելի վատ է։

Դամասկոսահայերի խոսքով, հայերի մի ստվար զանգված անհապաղ ուզում է լքել Սիրիան, սակայն ավիատոմսերի սակավության ու չափազանց բարձր արժեքների պատճառով նրանք զրկված են այդ հնարավորությունից։

Իսկ Լիբանանից Lurer.com-ին հայտնում են, որ Բեյրութում փակվել են դեպի օդանավակայան տանող ճանապարհները, ինչը, ըստ շրջանառվող լուրերի, կապված է սիրիացիների կողմից առևանգված լիբանանյան Հզբ'ոլլահ-ի 14 զինյալներին վերադարձնելու պահանջի հետ։