Սերգեյ Ֆրիդինսկին՝ ռուսական բանակում հանցագործությունների մասին

2012թ.-ի առաջին կիսամյակում ռուսական բանակում ընդհանուր բնույթի հանցագործություններն իրենց քանակով առաջին անգամ գերազանցել են զինվորական հանցագործությունները: Գլխավոր զինվորական դատախազ Սերգեյ Ֆրիդինսկին, ելույթ ունենալով Գլխավոր դատախազության կոլեգիայում, ընդգծել է, թե հիմնական խնդիրն այն է, որ բանակում հանցավորության ուղղվածությունը վերջին տարիներին շեղվել է:

Ըստ Ֆրիդինսկու, հաշվետու ժամանակաշրջանում բանակում երկու անգամ ավելի հաճախ են սկսել կաշառք վերցնել, 53 տոկոսով աճել են սպանությունները և ավելի քան քառորդ անգամ' թմրամիջոցների անօրինական շրջանառությունը: Ինչպես հայտնում է Lenta.ru-ն, միևնույն ժամանակ մեկ երրորդով պակասել են ոչ կանոնագրքային հարաբերությունները:

Դատախազը նշել է նաև, որ հանցագործությունների զգալի մասը կապված է բյուջետային միջոցների յուրացման հետ: «ԻՏԱՌ-ՏԱՍՍ»-ի փոխանցմամբ, պաշտպանության պետական պատվերների ոլորտում արձանագրվել է 3 հազար խախտում, ինչի հետևանքով հասցված վնասի չափը կազմել է 400 մլն ռուբլի:

2012-ի տարեսկզբին, ամփոփելով նախորդ տարվա արդյունքները, Ֆրիդինսկին հայտնել էր, որ պետպատվերների ոլորտում բյուջետային միջոցների յուրացումը հասել է «տիեզերական» մասշտաբների: Նրա տվյալներով, բանակում կաշառակերության հետևանքով ընդհանուր վնասը 2011թ.-ին գերազանցել է 3 մլրդ ռուբլին:

«Փաստինֆո» գործակալություն