Չե՛ք կոծկելու. ակցիա Քննչական գլխավոր վարչության դիմաց

Այսօր ոստիկանության Քննչական գլխավոր վարչության դիմաց «Պահանջում ենք պատժել «Հարսնաքարում» տեղի ունեցած միջադեպի բոլոր մեղավորներին» նախաձեռնության խումբը կազմակերպել էր ակցիա, որով պահանջում էր նախաքննության մարմնի կողմից գործի քննության համար տրամադրված մեկ օրվա ժամկետը վերանայել։

Ինչպես նշեց փաստաբան Տիգրան Եգորյանը, հատկացված մեկ օրվա ժամկետը ողջամիտ չէ։ «Միջնորդել ենք, որպեսզի մեզ հատկացնեն մեկամսյա ժամկետ։ Այս հապճեպությունը և համակարգված գործելաոճը մեզ հիմք է տալիս ենթադրելու, որ կան բացահայտման ենթակա լրջագույն խնդիրներ»,– ասաց նա։

Վերջինիս խոսքերով՝ միջնորդությունները ուղարկված են Քննչական գլխավոր վարչության պետ Գագիկ Համբարձումյանին, Գլխավոր Դատախազություն, ոստիկանապետին, մարդու իրավունքների պաշտպանի գրասենյակ և փաստաբաննների պալատի նախագահին։

«Մենք ակնկալում ենք, որ մեր կողմից այս ամենի արծարծումը պետք է սթափեցնի նրանց, և ուշ չէ դեռ, որպեսզի վերականգնվի այս որոշումը։ Սա վկայում է այն մասին, որ քաղաքական իշխանություններն ու իրավապահները զբաղված են քրեական գործի կոծկմամբ»,–ամփոփեց Տիգրան Եգորյանը։

Ակցիայի կազմակերպիչներից Զարուհի Հովհաննիսյանը մեզ հետ զրույցում մասնավորապես նշեց. «Նախաքննական մարմինը ընդամենը մեկ օրվա ժամկետ է տվել՝ գործին ծանոթանալու համար։ Մենք՝ պայքարող քաղաքացիներս, հետամուտ ենք լինելու այս գործին։ Կազմակերպել ենք «Չեք կոծկելու ակցիան», որպեսզի պահանջենք գործին ծանոթանալու համար հատկացված ժամկետը երկարաձգվի, քանի որ մեկ օրում անհնար է 1000 էջանոց գործի նյութերին ծանոթանալը»։