Հայաստանում ուժեղ երկրաշարժեր չեն սպասվում. ԱԻՆ

Հայաստանում սպասվող ուժեղ երկրաշարժի մասին տարածվող լուրերն իրականությանը չեն համապատասխանում և այդպիսի վտանգ առաջիկայում չի սպասվում, այս մասին Lurer.com-ին վստահեցրին Արտակարգ իրավիճակների նախարարությունից։

Կոչ է արվում մարդկանց պահպանել հանգստություն։ 

«Կոչ ենք անում մարդկանց պահպանել հանգստություն և ուշադրություն չդարձնել խուճապարարների տարածած ստահոդ լուրերին: Մինչև հիմա աշխարհում որևէ գիտնական, որևէ սեյսմիկ ծառայություն դեռևս չի կարող անել երկրաշարժի կարճաժամկետ կանխատեսում, այսինքն՝ ճշգրիտ ասել երկրաշարժի ժամը, տեղն ու ուժգնությունը»,- այս մասին հայտնում են Արտակարգ իրավիճակների նախարարությունից։

Հիշեցնենք, որ երկու օր առաջ երկրաշարժ էր գրանցվել Իրանի հյուսիս-արևմուտքում, Հայաստանի սահմանին մոտ, Թավրիզից 64 կմ արևելք, Ահարից 26 կմ հարավ։ Կոորդինատներն են՝ 38.24 N ; 47.00 E։

Երկրաշարժի հիպոկենտրոնը եղել է 15 կմ խորության վրա: Երկրաշարժի ուժգնությունը էպիկենտրոնային գոտում կազմել է 9 բալ, երկրաշարժը գրանցվել է նաև ՀՀ տարածքում. Ագարակ, Մեղրի, Քաջարան, Կապան, Գորիս քաղաքներում' 4-5 բալ ուժգնությամբ, իսկ Երևան քաղաքում' 3-4 բալ:

Ժամը 16.54-ին և 17.19-ին տեղի է ունեցել համապատասխանաբար 5.9 և 5.5 մագնիտուդով հետցնցումներ: